فیصلے کے لیے وڈیرے کے پاس جانیوالی زیادتی کی شکار لڑکی کی پراسرار موت
نوشہروفیروز (ویب ڈیسک) محبت ڈیرو میں مبینہ زیادتی کا نشانہ بننے کے بعد فیصلے کے لیے وڈیرے کے پاس جانے والی لڑکی پراسرار طور پرموت ہوگئی، لڑکی کی نانی کا دعویٰ ہے کہ زہر دے کر قتل کیاگیا جبکہ ابتدائی رپورٹ کے مطابق لڑکی کی موت نیند کی زیادہ گولیاں کھانے سےہوئی ہے۔
ڈی ایس پی نوشہرو فیروز نے بتایاکہ محبت ڈیرو میں دو ہفتے قبل لڑکی کے ساتھ مبینہ طور پر زیادتی ہوئی تھی، فریقین فیصلے کے لیے وڈیرے کے پاس گئے تھے، فیصلہ ہونے تک متاثرہ لڑکی کو وڈیرے کے گھر پر امانتاً رکھا گیا تھا۔
ادھر لڑکی کی نانی نے الزام عائد کیا کہ ملزمان نے لڑکی کو وڈیرے کے گھر سے اغوا کرنے کے بعد زہر دے کر قتل کیا تاہم ڈی ایس پی کے مطابق مقامی وڈیرے کے گھر سے لڑکی کے اغوا کی کوئی رپورٹ درج نہیں کی گئی۔
ابتدائی رپورٹ کے مطابق لڑکی کی موت نیند کی زیادہ گولیاں کھانے کے باعث ہوئی، تاہم پوسٹ مارٹم رپورٹ آنے کے بعد ہی حقائق سامنے آئیں گے۔
