بابا گورونانک کا 555 واں جنم دن،تیاریاں عروج پر،اعلیٰ افسران کاگوردوارہ جنم استھان کا دورہ
ننکانہ صاحب( ڈیلی پاکستان آن لائن )بابا گورونانک کا 555 واں جنم دن منانے کی تیاریاں عروج پر پہنچ گئیں ۔
تفصیلات کے مطابق ڈپٹی کمشنر ننکانہ صاحب محمد تسلیم اختر راؤ نےڈسٹرکٹ پولیس آفیسر سید ندیم عباس کے ہمراہ گوردوارہ جنم استھان کا دورہ کیا ، ایڈیشنل ڈپٹی کمشنرز اور ڈسٹرکٹ ایمرجنسی آفیسر ریسکیو 1122 سمیت دیگر افسران بھی ہمراہ تھے۔ضلعی سربراہان نے گوردوارہ جنم استھان کے انٹری اور ایگزیٹ پوائنٹس اور گوردوارہ جنم استھان میں تیزی سے جاری تزئین و آرائش کے کام کا جائزہ لیا۔
ڈی سی اور ڈی پی او نے مرکزی جلوس کے روٹس کا دورہ کرکے انتظامات کا جائزہ بھی لیا۔اس موقع پر ڈپٹی کمشنر ننکانہ صاحب محمد تسلیم اختر راؤ نے کہا کہ تمام گوردوارہ جات اور جلوس کے روٹس پر سی سی ٹی وی کیمروں کی تنصیب کا عمل جاری ہے،ننکانہ سٹی کو رنگ و روغن کے ساتھ ساتھ لائٹنگ سے سجایا جائے گا۔اداروں کی کارکردگی جانچنے کے لیے موک ایکسرسائز کا انعقاد بھی کیا جائے گا اورسکھ یاتریوں کے لیے صوفی نائٹ کا خصوصی اہتمام کیا جائے گا، سکھ یاتریوں کی رہائش ، کھانے سمیت تمام تر انتظامات مکمل کر لیے گئے ہیں۔
ڈی پی او سید ندیم عباس کا کہنا تھا کہ سکھ یاتریوں کی حفاظت یقینی بنانے کے لیے فول پروف سیکیورٹی انتظامات کیے جا رہے ہیں،دنیا بھر سے آنے والے سکھ یاتریوں کے لیے نیشنل لیول کے انتظامات کی فراہمی یقینی بنائیں گے۔
