درجۂ حرارت زیادہ، ممکنہ خشک سالی ، پی ڈی ایم اے کا اہم اجلاس ،کسانوں کے حوالے سے اہم فیصلے

لاہور ( ڈیلی پاکستان آن لائن )درجۂ حرارت معمول سے  زیادہ، ممکنہ خشک سالی ، پی ڈی ایم اے کے اہم اجلاس میں کسانوں کے حوالے سے اہم فیصلے کر لیے گئے ۔

 تفصیلات کے مطابق ڈی جی پی ڈی ایم اے عرفان علی کاٹھیا کی زیر صدارت کمیٹی روم میں اہم اجلاس ہوا۔ محکمہ زراعت ،آبپاشی،لوکل گورنمنٹ و کمیونٹی ڈویلپمنٹ،کووآپریٹو ڈیپارٹمنٹ محکمہ صنعت و تجارت اور ہاؤسنگ و اربن ڈویلپمنٹ کے افسران نے اجلاس میں شرکت کی۔ صوبے بھر سے واسا حکام اور اور پی ایچ اے افسران نے اجلاس میں ویڈیو لنک کے ذریعے شرکت کی۔ رواں سال معمول سے کم بارشوں کے باعث پانی کی کمی کے بارے میں تبادلۂ خیال کیا گیا۔ متعلقہ محکموں کی ممکنہ خشک سالی کے اثرات  کےبارے میں تفصیلی بریفنگ دی گئی۔ ڈی جی پی ڈی ایم اے نے واسا حکام کو پانی کے بچاؤ سے متعلق اقدامات کی ہدایات جاری کیں۔

 ڈائریکٹر جنرل پی ڈی ایم اے عرفان علی کاٹھیا کا کہنا تھا کہ وزیر اعلیٰ پنجاب مریم نواز  کی ہدایات کے مطابق تمام متعلقہ محکمے الرٹ رہیں۔ گزشتہ 4 ماہ میں پنجاب میں 38 فیصد کم بارشیں ہوئی ہیں۔ منگلا اور تربیلا ڈیم میں پانی کی سطح نہایت نچلے درجے پر ہے۔ واٹر کمیشن کی احکامات پر عملدرآمد کو یقینی بنایا جائے گا۔ عدالتی احکامات اور ہدایات پر عمل درآمد سے ممکنہ پانی کی قلت سے نمٹا جا سکتا ہے۔ملک بھر میں درجہ حرارت معمول سے 3-2 ڈگری سینٹی گریڈ زیادہ ہے۔ ممکنہ خشک سالی سے نمٹنے کیلئے تمام تر انتظامات پیشگی مکمل کیے جائیں۔ کسانوں کو پانی کی متوقع قلت کے بارے  میں آگاہ کیا جائے گا۔ پی ڈی ایم اے پنجاب صوبہ بھر کی انتظامیہ کو تمام تر وسائل فراہم کر رہا ہے۔