کوٹ سادات کے نوجوانوں نے اپنی مدد آپ کے تحت شجر کاری مہم شروع کردی
وہاڑی (ڈیلی پاکستان آن لائن) موسمیاتی تبدیلی کے بڑھتے ہوئے خطرات کے پیش نظر کوٹ سادات کے نوجوانوں نے اپنی مدد آپ کے تحت شجرکاری مہم کا آغاز کر دیا ہے۔ اس مہم کے دوران گاؤں کے مختلف علاقوں میں مختلف اقسام کے درخت اور پودے لگائے جا رہے ہیں۔
نوجوانوں کا کہنا ہے کہ یہ قدم ماحولیاتی بہتری، مون سون کے پانی کے مؤثر استعمال اور مقامی درجہ حرارت کو معتدل رکھنے کے لیے اٹھایا گیا ہے۔ مقامی افراد بھی اس اقدام کو سراہ رہے ہیں اور اس میں بڑھ چڑھ کر حصہ لے رہے ہیں۔
نوجوانوں نے ملک بھر کے لوگوں سے اپیل کی ہے کہ موسمیاتی تبدیلی ہم سب کا مشترکہ مسئلہ ہے اس لیے ہمیں کسی حکومتی امدادکا انتظار کیے بغیر خود سے ہی آگے بڑھ کر شجرکاری شروع کردینی چاہیے تاکہ آنے والی نسلوں کا مستقبل محفوظ کیا جاسکے۔
یاد رہے کہ حالیہ برسوں میں ماحولیاتی تبدیلیوں اور درجہ حرارت میں اضافے نے زراعت اور روزمرہ زندگی کو شدید متاثر کیا ہے، جس کا حل شجرکاری جیسے اقدامات میں پوشیدہ ہے۔
