عمران اعجاز نے ٹی ٹوئنٹی ورلڈ کپ جیتنے والی پاکستانی بلائنڈ ٹیم کیلیے 30 لاکھ روپے انعام کا اعلان کردیا
پاکستان(ڈیلی پاکستان آن لا) انٹرنیشنل بلائنڈ ٹی ٹوئنٹی کرکٹ ورلڈ کپ 2024جیتنے والی قومی ٹیم پر انعامات کی بارش کا سلسلہ جاری ہے ،پہلے پاکستان کرکٹ بورڈ کی جانب سے قومی بلائنڈ کرکٹ ٹیم کے لیے1 کروڑ روپے انعام کا اعلان کیا گیا تو اب ٹی ٹوئنٹی کرکٹ ورلڈ کپ 2024کے آفیشل سپانسر اور پاکستان کے معروف فاسٹ فوڈ برانڈ کے مالک عمران اعجاز نے قومی بلائنڈ کرکٹ ٹیم کو ان کی تاریخی فتح پرمبارکباد پیش کرتے ہوئے 30 لاکھ روپے کی انعامی رقم کا اعلان کیا ہے۔
ملتان کرکٹ سٹیڈیم میں کھیلے گئے فائنل میں پاکستان نے بنگلہ دیش کو 10 وکٹوں سے شکست دے کر پہلی بار ٹی ٹوئنٹی بلائنڈ کرکٹ ورلڈ کپ کا ٹائٹل اپنے نام کیا ہے۔انعامی رقم کا اعلان پاکستان کی بلائنڈ کرکٹ ٹیم کی لگن،جوش اور جذبے کے ساتھ غیرمعمولی کارکردگی کا اعتراف ہے۔
معروف فاسٹ فوڈ برانڈ کے ہیڈ آف مارکیٹنگ زوہیب حسن نے کہاہے کہ قومی بلائنڈ کرکٹ ٹیم کی اس شاندار فتح سے ہم بہت خوش ہیں کیونکہ اس فتح نے پوری قوم کا سرفخر سے بلند کردیاہے، ہمیں حالیہ ٹی ٹوئنٹی بلائنڈ ورلڈ کپ کے دوران پاکستان کی بلائنڈ کرکٹ ٹیم کو سپورٹ کرنے کا اعزاز حاصل ہے۔ یہ جیت کھلاڑیوں کے غیر متزلزل عزم کا منہ بولتا ثبوت ہے اور 30 لاکھ روپے کی انعامی رقم ان کی کامیابی کا جشن منانے کے لیے ہماری ادنیٰٰ سی کوشش اور مستقبل کی کامیابیوں کے لیے ان کی حوصلہ افزائی ہے۔
