مبینہ کرپشن کیس: پرویز الٰہی فرد جرم عائد کرنے کیلئے 7 جنوری کو طلب

لاہور ( ڈیلی پاکستان آن لائن ) احتساب عدالت نے سابق وزیراعلیٰ پنجاب چودھری پرویز الٰہی کو ترقیاتی منصوبوں میں مبینہ کرپشن کیس میں فرد جرم عائد کرنے کیلئے 7 جنوری کو طلب کرلیا۔
نجی ٹی وی دنیا نیوز کے مطابق لاہور کی احتساب عدالت نے چودھری پرویز الٰہی سمیت دیگر ملزمان پر ترقیاتی منصوبوں میں مبینہ کرپشن ریفرنس کی گزشتہ سماعت کا تحریری حکم جاری کردیا۔
عدالت نے پرویز الٰہی کو فرد جرم عائد کرنے کے لئے سات جنوری کو طلب کرلیا۔
عدالتی حکم میں کہا گیا کہ عدالت کو ملزمان کی حاضری مکمل کرنے میں کافی دشواری ہے، تاریخ پر تمام ملزمان حاضر ہوتے اور عدالت فرد جرم عائد کرتی ، عدالت انصاف کے تقاضوں کو پورا کرتے ہوئے محسوس کرتی ہے کہ حاضر ملزمان پر فرد جرم عائد کی جائے۔
تحریری حکم میں کہا گیا کہ عدالت کسی قسم کی مزید تاخیر نہیں کرتی، اس سے پچھلی تاریخ پر محمد خان بھٹی کی میڈیکل گراو¿نڈ پر حاضری معافی تھی، آج پرویز الٰہی کی طبی بنیادوں پر حاضری معافی کی درخواست پیش ہوئی، پرویز الٰہی کی ایک روزہ حاضری معافی کی درخواست منظور کی جاتی ہے۔
عدالت نے تحریری حکم میں مزید کہا کہ عدالت محمد خان بھٹی، خالد محمود چٹھہ ،آصف محمود ،نعیم اقبال ،محمد اصغر اور اسد علی پر فرد جرم عائد کرتی ہے۔