عظمیٰ بخاری کو پی پی سے مسئلہ ہے تو بیٹھ کر حل کریں، غلط بیانات نہ دیں: شرجیل میمن
کراچی ( ڈیلی پاکستان آن لائن ) پاکستان پیپلز پارٹی کے رہنماءاور وزیر اطلاعات سندھ شرجیل انعام میمن نے کہا ہے کہ کوئی عقلمند انسان عظمیٰ بخاری جیسا بیان نہیں دے سکتا، اگر عظمیٰ بخاری کو پیپلز پارٹی کے ساتھ کوئی مسئلہ ہے تو بیٹھ کر حل کریں نہ کہ غلط بیانات دیں۔
نجی ٹی وی دنیا نیوز کے مطابق میڈیا سے گفتگو کرتے ہوئے شرجیل میمن کا کہنا تھا کہ ن لیگ میں کچھ نا سمجھ لوگ ہیں جو آئین پڑھتے نہیں اور بیان دے دیتے ہیں، پروپیگنڈا وہ لوگ کر رہے ہیں جو کل کالا باغ ڈیم کی حمایت میں ریلیاں نکال رہے تھے، حکومت چھوڑنا بڑی بات نہیں، حالات اوروقت کے مطابق فیصلے کرنے ہوتے ہیں، کالاباغ ڈیم کو صدرزرداری نے دفن کیا۔
انہوں نے کہا کہ چیئرمین بلاول بھٹو نے واضح الفاظ میں کہا ہے کہ میں عوام کے ساتھ کھڑا ہوں نہ کہ شہباز شریف کے ساتھ، پیپلز پارٹی نے کہا تھا کہ پی ٹی آئی سے بات کرنے کو تیار ہیں لیکن پی ٹی آئی نے منع کر دیا۔
ان کا کہنا تھا کہ پیپلز پارٹی چاہتی ہے کہ تمام صوبے مل کر چلیں اور کام ہو، مشکل حالات میں پیپلز پارٹی نے ملک کو مضبوط کیا، شہید بھٹو، شہید بی بی، صدر آصف علی زرداری نے ہمیشہ پاکستان کو مضبوط کیا۔
وزیر اطلاعات سندھ نے کہا کہ سی سی آئی کے ذریعے وزیر اعلیٰ کئی باروفاقی حکومت کو خط لکھ چکے ہیں، ہم متعدد بار واضح کر چکے ہیں کہ کینالز کے معاملے پر کوئی سمجھوتانہیں ہوگا، پارٹی نے کینالز کی کھل کر مخالفت کی ہے، وفاقی حکومت کے ساتھ مذاکرات چل رہے ہیں۔
شرجیل میمن کا کہنا تھا کہ ہمارا جینا مرنا عوام کے ساتھ ہے، ہم کینالز نہیں دینے دیں گے، برے حالات میں پیپلز پارٹی نے ملک کو مضبوط کیا، آصف علی زرداری کی صحت بہتر ہے، پیپلز پارٹی کی لیڈر شپ کبھی نہیں گھبرائی، سندھ کے حقوق کے لئے جو صدرمملکت نے کیا وہ کسی نے نہیں کیا۔
