اسمبلی میں کہتا تھا اسکی جیبوں کی تلاشی لیں،وزیر دفاع خواجہ آصف نے بانی پی ٹی آئی کو " جیب کترا " کہہ دیا

سیالکوٹ ( ڈیلی پاکستان آن لائن ) اسمبلی میں کہتا تھا اسکی جیبوں کی تلاشی لیں،وزیر دفاع  خواجہ آصف نے بانی پی ٹی آئی کو " جیب کترا " کہہ دیا ۔

تفصیلات کے مطابق وزیر دفاع خواجہ آصف کا کہنا ہے کہ پی ٹی آئی والوں نے اب ایک دوسرے کو چور کہنا شروع کردیا، لیڈر تو ان کا سند یافتہ چور ہے، بانی پی ٹی آئی اول و آخر "جیب کترا" تھا، اسمبلی میں کہتا تھا کہ اسکی جیبوں کی تلاشی لیں، خالی ملیں گی۔

"جنگ " کے مطابق سیالکوٹ میں کارکنوں سے خطاب کرتے ہوئے خواجہ آصف نے کہا کہ ملک جس نہج پر کھڑا تھا، تباہی ہی تباہی تھی، کھنڈرات تھے، جن پر ہم نے عمارت تعمیر کرنے کی کوشش کی، پی ڈی ایم میں تمام پارٹیوں نے مل کر بڑی محنت سے امید کی کرن دکھائی، بیرون ملک پی ٹی آئی کے کچھ لوگ ملک دشمنی کر رہے ہیں۔رات کو سوتے تھے تو خوف آتا تھا کہ آئی ایم ایف ہمارا ہاتھ پکڑے گا یا نہیں، شہباز شریف کبھی آئی ایم ایف کبھی چین اور کبھی سعودی عرب جاتے رہے، اس وقت کوئی سوچ بھی نہیں سکتا تھا کہ بجلی سستی ہوجائے گی۔مریم پنجاب کو چار چاند لگا رہی ہے، آئندہ چند ماہ میں سیالکوٹ کی شکل بھی بدلتی نظر آئے گی، نواز شریف، مریم نواز اور شہباز شریف جب بھی آئیں گے ترقی کے سفر کا آغاز ہوگا۔

خواجہ آصف نے کہا کہ دہشت گردی عروج پر ہے، روزانہ فوجی جوان شہید ہورہے ہیں، فوجی عید کے روز بھی سرحدوں پر پہرہ دے رہے تھے۔

انہوں نے کہا کہ میں 6 ماہ قید میں رہا ملاقات بھی بند تھی، یہاں تو ملاقاتیں عام ہورہی ہیں، اربوں روپے کہاں سے آئے، جو وکلاء کو دیئے گئے، ان کے ایسے ایسے لیڈر ہیں جن کے گھر والے ان کو ووٹ نہیں دیتے، پی ٹی آئی کے ٹکڑے ہوچکے ہیں، یہ ایک دوسرے کو گالیاں نکالتے ہیں۔ ہم تو جیل میں فرش پہ سوتے تھے، بانی پی ٹی آئی کو جیل میں تمام سہولتیں ملی ہیں، بانی پی ٹی آئی کو دیسی مرغ اور کشتے بھی ملتے ہیں، یہ کہتے تھے اوورسیز پاکستان رقوم نہ بھیجیں، لیکن پاکستانیوں نے زیادہ رقوم بھیجیں۔