یونان: غیر قانونی تارکین وطن کی ایک اور کشتی حادثے کا شکار، 39 افراد کو بچا لیا گیا
ایتھنز (ڈیلی پاکستان آن لائن )یونان سے ایک اور افسوسناک خبر سامنے آئی ہے جہاں غیر قانونی تارکینِ وطن کو لے جانے والی ایک اور کشتی حادثے کا شکار ہو گئی۔
روز نامہ امت کے مطابق ترکیہ سے روانہ ہونے والی ایک ربڑ بوٹ (رافٹ) یونانی جزیرے کاستیلوریزو پہنچنے کی کوشش کے دوران ڈوب گئی۔ کشتی میں 40 افراد سوار تھے جن میں 13 معصوم بچے بھی شامل تھے۔
یونانی کوسٹ گارڈ کے مطابق حادثے کے بعد فوری ریسکیو آپریشن کیا گیا جس میں 38 تارکین وطن اور ایک انسانی سمگلر کو زندہ بچا لیا گیا جبکہ ایک شخص کی لاش سمندر سے نکال لی گئی۔ ڈوبنے والے شخص کی قومیت، جنس یا عمر کے بارے میں معلومات فراہم نہیں کی گئیں۔
رپورٹس کے مطابق ربڑ کی کشتی کی گنجائش صرف 8 سے 10 افراد کی تھی لیکن انسانی سمگلر نے زیادہ منافع کے لالچ میں 40 افراد کو سوار کرا دیا۔ نہ کسی کو لائف جیکٹ دی گئی اور نہ ہی کشتی میں زندگی بچانے کا کوئی سامان موجود تھا۔
