مراکش کشتی حادثے میں جاں بحق 4 پاکستانیوں کی لاشیں وطن واپس پہنچا دی گئیں

اسلام آباد(ڈیلی پاکستان آن لائن)مراکش کشتی حادثے میں جاں بحق 4 پاکستانیوں کی لاشیں وطن پہنچادی ئیں۔ 
نجی ٹی وی جیو نیوز کے مطابق مراکش کشتی حادثے میں جاں بحق 4 پاکستانیوں کی لاشوں کو پرواز ایس وی 726 کے ذریعے اسلام آباد پہنچایا گیا۔ 
ذرائع کے مطابق 2 میتوں کا تعلق منڈی بہاءالدین اور ایک کا تعلق شیخوپورہ سے ہے جبکہ جن افراد کی لاشیں وطن واپس لائی گئیں ان میں محمد ارسلان،علی سجاد،حامد شبیر اور اقبال وقاص شامل ہیں۔ 
پاکستانیوں کی وطن واپسی کے موقع پر وفاقی وزیر چودھری سالک ایئرپورٹ پر موجود تھے۔
واضح رہے کہ 15 جنوری کو کشتی واقعہ میں 44 پاکستانیوں کے جاں بحق ہونے کی اطلاعات سامنے آئی تھیں تاہم مقامی حکام کو ریسکیو آپریشن کے دوران صرف 13 لاشیں ملیں جن کا تعلق پاکستان سے تھا جب کہ 27 سے زائد لاشیں نہیں ملیں۔