وزیراعظم شہباز شریف آج قذافی سٹیڈیم کا افتتاح کریں گے
لاہور (ڈیلی پاکستان آن لائن) آئی سی سی چیمپئنز ٹرافی اور تین ملکی ٹورنامنٹ کی میزبانی کیلئے قذافی سٹیڈیم مکمل طور پر تیار ہے، وزیراعظم شہبازشریف آج افتتاح کریں گے۔
تفصیلات کے مطابق نئے تعمیر کردہ قذافی سٹیڈیم کا آج باقاعدہ افتتاح ہوگا ، وزیراعظم شہبازشریف آج شام سات بجے قذافی سٹیڈیم کا افتتاح کریں گے۔اس موقع پر سٹیڈیم عوام کا داخلہ مفت ہو گا ، سٹیڈیم کی رنگارنگ افتتاحی تقریب میں معروف سنگر آواز کا جادو جگائیں گے جبکہ علی ظفر،عارف لوہار اور آئمہ بیگ افتتاحی تقریب میں پر فارم کریں گے۔
چیئرمین پی سی بی محسن نقوی سٹیڈیم کی افتتاحی تقریب کے انتظامات کا جائزہ لینےکیلئے صبح وطن واپسی پر بغیر آرام کئے اسٹیڈیم پہنچ گئے۔محسن نقوی نے افتتاحی تقریب کیلئے شاندار انتظامات کی ہدایت کرتے ہوئے کہا کہ ایونٹ کو نئے قذافی سٹیڈیم کے شایان شان ہونا چاہیے۔چیئرمین پی سی بی کا کہنا تھا کہ آج پاکستان کے لئے فخر کا مقام ہے، ریکارڈمدت میں سٹیڈیم کی تعمیر نو کا کام مکمل کرنے کا کریڈٹ پوری ٹیم کو جاتا ہے۔
ان کا کہنا تھا کہ دنیائے کرکٹ کا خوبصورت ترین و عالمی معیار کا قذافی سٹیڈیم ریکارڈمدت میں مکمل ہوا، قوم سے کیا وعدہ پورا ہونے پر اللہ تعالٰی کا شکر گزار ہوں۔محسن نقوی نے ورکرز، ایف ڈبلیو او، نیسپاک، کنٹریکٹر اور پی سی بی کا تہہ دل سے شکریہ ادا کرتے ہوئے کہا کہ شائقین اور کھلاڑی سٹیڈیم میں فراہم کردہ جدید سہولتوں سے محظوظ ہوں گے۔
خیال رہے سٹیڈیم کو مکمل طور پر منہدم کرکے نیا تعمیر کیا گیا ہے، آٹھ اکتوبر دو ہزار چوبیس کو تعمیراتی کام کا آغاز ہوا، اور چار ماہ دن رات ایک کرکے سٹیڈیم کو مکمل کیا گیا ہے۔
سٹیڈیم کی گنجائش بڑھا کر پینتیس ہزار کردی گئی ہے اور ہر انکلوژر میں نئی کرسیاں نصب ہیں، چار سو اسی ایل ای ڈی لائٹس بھی لگائی گئی ہیں جبکہ شائقین کو بہترین ویو دینے کیلئے گراؤنڈ میں لگا جنگلہ ہٹادیا گیا ہے۔
