عمران خان کے جرائم کی معافی پر مذاکرات ہوئے تو سب سے بڑھ کر تنقید کروں گا، ملک احمد خان
لاہور(ڈیلی پاکستان آن لائن)سپیکرپنجاب اسمبلی ملک احمد خان نے کہا ہے کہ جرائم اور سیاست میں فرق کرنا ہوگا، بانی پی ٹی آئی کے جرائم معاف نہ کیے جائیں، ان کے جرائم کی معافی پر مذاکرات پر سب سے بڑھ کر تنقید کروں گا۔
میڈیا سے گفتگو میں اسپیکر پنجاب اسمبلی نے سیاست کو اداروں پر تنقید کا محور نہ بنانے کا مشورہ دیتے ہوئے کہا کہ گھر کو جلانا سیاسی حق نہیں ہے، سیاست کے نام پر انتشار میں فرق کریں، جرائم و سیاست میں فرق ہے۔ان کا کہنا تھا کہ بانی پی ٹی آئی کے جرائم معاف نہ کیے جائیں، جرائم کی معافی پر مذاکرات ہوئے تو سب سے بڑھ کر تنقید کروں گا۔قائم مقام گورنر ملک احمد خان کا کہنا تھا کہ فوج کا کندھا خود استعمال کرو تو ٹھیک کوئی دوسرا کرے تو تنقید ہوتی ہے۔
ایک سوال کے جواب میں انہوں نے کہا کہ پیپلزپارٹی کے ساتھ اچھے ورکنگ ریلیشن ہے، پنجاب میں بھی اچھا معاملہ ہے انفرادی طور پر معاملہ ہو سکتا ہے۔
ان کا کہنا تھا کہ محکمہ صحت میں تبدیلیاں ہو رہی ہے جس کے اثرات عوام میں نظر آئیں گی اور صفائی کے علاوہ تعلیم پر بھی توجہ دی جارہی ہے۔
