بیوی یا خاتون کو عزت نہ دینے والا کبھی مرد ہو ہی نہیں ہوسکتا: جان ریمبو
لاہور (ڈیلی پاکستان آن لائن )ماضی کے مقبول فلمی ہیرو جان ریمبو کا کہنا ہے کہ اپنی بیوی یا کسی بھی خاتون کو عزت نہ دینے والا شخص کبھی مرد ہو ہی نہیں سکتا۔
جان ریمبو نے حال ہی میں ساتھی اداکار سعود کے ہمراہ سما ٹی وی کے مارننگ شو میں شرکت کی، جہاں دونوں نے شوبز انڈسٹری سمیت ذاتی زندگی پر بھی کھل کر بات کی۔پروگرام کے دوران بات کرتے ہوئے جان ریمبو نے یہ بھی بتایا کہ انہوں نے پہلی بار اہلیہ صاحبہ کو کیسے شادی کی پیش کش کی تھی؟
اداکار کے مطابق دونوں نے جب پہلی بار ایک ساتھ فلم کی، تب ہی انہیں صاحبہ پسند آگئی تھیں، ان کی پہلی جبکہ صاحبہ کی تیسری فلم تھی۔ان کا کہنا تھا کہ صاحبہ کی پہلی دونوں فلمیں فلاپ ہوگئی تھیں، ان کے ساتھ تیسری فلم کامیاب ثابت ہوئی اور شوٹنگ کے دوران ہی انہیں اداکارہ پسند آگئی تھیں۔اداکار کے مطابق انہوں نے ایک ساتھ پہلی فلم کی شوٹنگ کے دوران ہی صاحبہ کو واضح طور پر کہا کہ وہ ان سے شادی کرنا چاہتے ہیں لیکن ان کی بات نہ بنی اور اداکارہ ان سے دور رہنے لگیں۔
جان ریمبو کا کہنا تھا کہ بعد ازاں صاحبہ بھی ان کے قریب آنے لگیں اور دونوں کے درمیان قربتیں بڑھنے لگیں، پھر دونوں نے شادی کرلی۔ان کے مطابق صاحبہ نے ان سے شادی کے لئے ایک ہی فرمائش کی کہ وہ انہیں جھونپڑی میں بھی رکھیں گے، تب وہ رہ لیں گی لیکن وہاں اے سی ہونا چاہئے۔ایک سوال کے جواب میں جان ریمبو کا کہنا تھا کہ وہ اہلیہ سے ڈرتے نہیں ہیں، البتہ ان کی عزت کرتے ہیں، انہیں پیار دیتے ہیں اور اہلیہ بھی انہیں اتنی ہی عزت اور پیار دیتی ہیں۔
کامیاب ازدواجی زندگی پر بات کرتے ہوئے جان ریمبو نے کہا کہ ان کے درمیان بھی لڑائی جھگڑے ہوتے ہیں لیکن دونوں کی یہ بات اچھی ہے جبکہ ایک کو غصہ آتا ہے تو دوسرا خاموش ہوجاتا ہے اور یہی ان کی ازدواجی زندگی کی کامیابی ہے۔
اسی حوالے سے بات کرتے ہوئے انہوں نے شادی شدہ مرد حضرات کو مشورہ دیا کہ جب بھی ان کا اہلیہ سے جھگڑا ہو اور اگر بیوی بات کر رہی ہوں تو شوہر حضرات خاموشی سے ان کی بات سن لیا کریں، چند منٹ بعد ہی اہلیہ کو اپنی غلطی کا احساس ہوجائے گا۔انہوں نے دعویٰ کیا کہ بیوی کے غصے کے وقت شوہروں کے خاموش ہوجانے سے بیویوں کو جلد اپنی غلطی کا احساس ہوجاتا ہے اور پانچ منٹ بعد ہی بیوی چائے کا کپ لے کر سامنے آجاتی ہیں۔
جان ریمبو نے مزید کہا کہ جس طرح بیوی اپنے شوہر کی عزت کرتی ہیں، اسی طرح شوہروں کو بھی چاہئے کہ وہ اپنی بیویوں کی عزت کریں، عزت اور محبت بیویوں کا حق ہے، جو انہیں ملنا چاہئے۔ان کے مطابق جو افراد بیوی یا خاتون کی عزت نہیں کرتے، وہ مرد ہو ہی نہیں سکتے۔