لاہورہائیکورٹ؛ خلیل الرحمان قمر ہنی ٹریپ کیس کی ملزمہ کی درخواست ضمانت خارج 

لاہور(ڈیلی پاکستان آن لائن)لاہورہائیکورٹ نے خلیل الرحمان قمر ہنی ٹریپ کیس کی ملزمہ کی درخواست ضمانت خارج  کردی اور کیس کا ٹرائل ایک ماہ میں مکمل کرنے کا حکم دیدیا۔

نجی ٹی وی چینل جیو نیوز کے مطابق لاہور ہائیکورٹ میں ڈرامہ نگار خلیل الرحمان قمر ہنی ٹریپ کیس کی ملزمہ کی درخواست ضمانت پر سماعت ہوئی،چیف جسٹس لاہور ہائیکورٹ عالیہ نیلم اور جسٹس اسجد جاوید گھرال پر مشتمل بنچ نے سماعت کی،چیف جسٹس عالیہ نیلم نے استفسار کیا کہ ملزمہ آمنہ عروج کیا کرتی ہے؟وکیل صفائی نے کہاکہ ملزمہ پراپرٹی کا کام کرتی ہے اور پروموشنل ویڈیوز بناتی ہے،چیف جسٹس عالیہ نیلم نے کہاکہ ملزمہ تسلیم کررہی ہے کہ وہ ویڈیوبنانا جانتی ہے،اتنے بڑے شہر میں اکیلے رہنا ،پراپرٹی کاکام کرنا، کوئی بہادر خاتون ہی کر سکتی ہے،اگر ملزمہ کو بلیک میل کیا جارہا تھاتو وہ خاموش نہ رہتی،آپ کہتے ہیں ملزمہ شوبز سے منسلک ہے، کیا کسی ڈرامے میں کام کیا، کبھی آپ کہتے ہیں کہ ملزمہ پروموشنل ویڈیوز بناتی ہے،سرکاری وکیل نے کہاکہ ٹرائل کورٹ میں فرد جرم عائد ہو چکی ، گواہوں کے بیانات قلمبند ہو رہے ہیں۔

عدالت نے خلیل الرحمان قمر ہنی ٹریپ کیس کی ملزمہ کی درخواست ضمانت خارج  کردی اور ٹرائل کورٹ کو ہنی ٹریپ کیس کا ٹرائل ایک ماہ میں مکمل کرنے کا حکم دیدیا،لاہور ہائیکورٹ نے شریک ملزم یاسر کی درخواست ضمانت منظور کرلی ،چیف جسٹس لاہور ہائیکورٹ نےکہاکہ ستمبر سے درخواست ضمانت زیرالتوا ہے،آپ نے کافی وقت لیا،ہمارے ملک  میں قانون کا غلط استعمال کرنا ٹرینڈ بن چکا ہے۔

یاد رہے کہ 21جولائی کو تھانہ سندر میں خلیل الرحمان قمر نے مقدمہ درج کرایا تھا،ملزمان پر اغوا، بلیک میلنگ، مہنگاسیل فون، ڈھائی لاکھ روپے لوٹنے کا الزام ہے۔