لاہور:گنگارام ہسپتال کی سوشل ویلفیئر آفیسر کا جعلی دستخط سے لاکھوں بٹورنے کا انکشاف

لاہور (ڈیلی پاکستان آن لائن )لاہور کے گنگارام ہسپتال کی سوشل ویلفیئر آفیسر کا جعلی دستخط کے ذریعے لاکھوں روپے بٹورنے کا انکشاف ہوا ہے۔
نجی ٹی وی جیو نیوز کے مطابق اسسٹنٹ ڈائریکٹر سوشل ویلفیئر کے مراسلے نے لاکھوں کی جعلسازی کا بھانڈا پھوڑ دیا ہے۔
اسسٹنٹ ڈائریکٹر سوشل ویلفیئر کے مراسلے میں بتایاگیا ہے کہ سوشل ویلفیئر آفیسر سمانیہ اختر 2 سال سے بیت المال کی رقم بٹورتی رہیں، سمانیہ اختر آو¿ٹ ڈور پرچی پر جعلی دستخط اور جعلی سٹیمپ لگاتی رہی جن مریضوں کے نام سے ادویات خریدی گئیں، مریضوں کو ان کی ضرورت نہ تھی۔
مراسلے میں انکشاف کیا گیا ہے کہ آوٹ ڈور پرچی پر 26 مریضوں کے نام پر ادویات لکھ کر خریدی گئی ہیں جبکہ آوٹ ڈور پرچیوں پر ڈاکٹر سیف الرحمان کے دستخط بھی موجود ہیں۔
دوسری جانب ڈاکٹر سیف الرحمان کا کہنا ہے کہ ان کے جعلی دستخط کئے گئے اور سٹیمپ بھی جعلی لگائی گئی ہے۔
مراسلے کے مطابق ادویات کی مد میں 26 لاکھ 66 ہزار 850 روپے نکلوائے گئے لہٰذا ایم ایس گنگا رام ہسپتال 2 سال میں نکلوائی گئی رقم کی تحقیقات کروائیں۔
اے ایم ایس گنگا رام ڈاکٹر عارف کا کہنا ہے کہ سمانیہ اختر کنٹریکٹ پر ملازم ہے اور سوشل ویلفیئر کے کئی افسران اس طرح کی جعلسازی میں ملوث ہیں۔