سابق وزیراعلیٰ بلوچستان میر نصیر خان مینگل سے مسلم لیگی وفد کی ملاقات ، بیٹے کی شہادت پر تعزیت کی
کوئٹہ (نمائندہ خصوصی) سابق وزیراعلیٰ بلوچستان میر نصیر خان مینگل سے مصطفیٰ ملک کی قیادت میں مسلم لیگی وفد نے ملاقات کی، جس میں نعمت خان خلجی، رکن الدین میرانی اور دوسرے عہدے دار شامل تھے ۔
پارٹی وفد نے میر نصیر مینگل کے بیٹے شہید عطاءالرحمن مینگل کی شہادت پر فاتحہ خوانی اور تعزیت کی ۔ اس موقع پر مصطفیٰ ملک نے کہا میر عطاءالرحمن کی شہادت مینگل خاندان اور محب وطن قوتوں کا بہت بڑا نقصان ہے۔میر عطاءالرحمن اور انکا خاندان محب وطن اور پاکستان کا وفادار ہے۔میر نصیر مینگل کا جذبہ اور استقامت قابل تقلید ہے ۔
میر نصیر خان مینگل نے کہا بلوچستان میں بدامنی کے پیچھے غیر ملکی ہاتھ ہے ، غیر ملکی ایجنڈے پر عمل پیرا عناصر ہی ملک کی جڑیں کھوکھلی کر رہے ہیں ۔ بیٹے کی شہادت سے حوصلے پست نہیں ہوئے ، پاکستان سے محبت ہمارے خون اور ایمان کا حصہ ہے ۔بلوچستان کی ترقی اور خوشحالی کے لیے امن ضروری ہے۔پاک فوج بلوچستان میں امن کے لیے قربانیاں دے ہی ہے ۔ بلوچستان کے عوام قیام امن اور ترقی کے سفر میں اپنے سیکورٹی اداروں کے ساتھ ہیں ۔
میر نصیر مینگل نے مزید کہا بلوچستان کے حقوق اور پاکستان سے وفاداری کی آواز بلند کرتے رہیں گے ۔ بلوچستان میں جاری کشیدگی کے خاتمے کے لیے ہر ایک کو اپنی کوششیں کرنی چاہئیں۔ ہم سب کا ایجنڈا پر امن بلوچستان اور خوشحال پاکستان ہونا چاہیے۔ نئی نسل کو ہتھیار نہیں تعلیم اور روزگار کی ضرورت ہے ۔
