سکھر میں 3 ہزار سے زائد طلباء نے سب سے بڑا انسانی پرچم بنا کر تاریخ رقم کردی

سکھر ( ڈیلی پاکستان آن لائن )  سکھر میں 3 ہزار سے زائد طلباء نے سبز ہلالی پرچم کا سب سے بڑا انسانی ماڈل بنا کر مثال قائم کر دی ۔

’’جنگ ‘‘ کے مطابق سکھر میں گذشتہ  روز 3080 طلباء نے معرکۂ حق اور یومِ آزادی کی تقریبات کے سلسلے میں سبز ہلالی پرچم کا سب سے بڑا انسانی قومی پرچم تشکیل دے کر ایک نیا ریکارڈ قائم کیا۔یہ سکھر کی تاریخ کا اپنی نوعیت کا پہلا منفرد ایونٹ تھا، تقریب کے دوران ’’پاکستان زندہ باد‘‘ اور’’ کشمیر بنے گا پاکستان‘‘ کے فلک شگاف نعرے گونجتے رہے۔

 کئی دنوں کی محنت اور ریہرسل کے بعد سبز و سفید لباس میں ملبوس بچوں نے شاندار قومی جذبے کا مظاہرہ کرتے ہوئے یہ تاریخی انسانی پرچم مکمل کیا۔تقریب میں شہداء کو خراجِ عقیدت پیش کیا گیا اور قومی یکجہتی، پاکستان کی سالمیت اور آزادی کے تحفظ کے لیے ہر قربانی دینے کا عہد کیا گیا۔