ڈیزل 12 روپے 84 پیسے سستا کردیا گیا، پٹرول کی قیمت برقرار
اسلام آباد (ڈیلی پاکستان آن لائن) حکومت نے پیٹرولیم مصنوعات کی قیمتوں میں ردوبدل کا اعلان کیا ہے۔ خزانہ ڈویژن کی جانب سے پیٹرولیم مصنوعات کی قیمتوں میں تبدیلی کا نوٹی فیکیشن جاری کردیا گیا۔
نوٹی فیکیشن کے مطابق ہائی سپیڈ ڈیزل کی فی لیٹر قیمت میں 12 روپے 84 پیسے کی کمی کی گئی ہے جس کے بعد اس کی نئی قیمت 272 روپے 99 پیسے ہوگئی۔اس سے قبل ہائی سپیڈ ڈیزل کی قیمت 285 روپے 83 پیسے تھی۔
حکومت کی طرف سے پیٹرول کی قیمت میں کوئی کمی بیشی نہیں کی گئی اور فی لیٹر 264 روپے 61 پیسے کے حساب سے اس کی فروخت جاری رہے گی۔
لائٹ ڈیزل کی قیمت میں 8 روپے 20 پیسے کی کمی کی گئی ہے اور اس کی نئی قیمت 162 روپے 37 پیسے مقرر کی گئی ہے جبکہ اس سے قبل یہ فی لیٹر 170 روپے 36 پیسے کے حساب سے فروخت ہو رہا تھا۔
اسی طرح مٹی کے تیل کی قیمت 7 روپے 19 پیسے کم کی گئی ہے جس کے بعد یہ فی لیٹر 178 روپے 27 پیسے کا ہو گیا ہے جبکہ اس سے قبل اس کی قیمت فروخت 185 روپے 46 پیسے مقرر تھی۔
قیمتوں میں یہ تبدیلی 15 روز کیلئے کی گئی ہے اور اس کا اطلاق رات 12 بجے سے ہوچکا ہے۔
