پاک فوج کا فلڈ ریلیف آپریشن جاری،بونیر، سوات  اور باجوڑ میں ٹیمیں امدادی سرگرمیوں میں مصروف

لاہور ( طیبہ بخاری سے ) پاک فوج کا سیلاب زدہ علاقوں میں فلڈ ریلیف آپریشن جاری ہے ۔

سیکیورٹی ذرائع نے بتایا ہے کہ خیبر پختونخوا کے سیلاب زدہ علاقوں میں پاک فوج کی امدادی کارروائیاں جاری  ہیں ، پاک فوج کے قافلے امدادی سامان لے کر سیلاب زدہ علاقوں کی طرف رواں دواں ہیں ۔پاک فوج مشکل کی اس گھڑی میں پختون عوام کیساتھ کھڑی ہے

بونیر، سوات  اور باجوڑ میں پاک فوج  اور فرنٹیئر کور کا فلڈ ریلیف آپریشن جاری  ہے ،پاک فوج کی ٹیمیں امدادی سرگرمیوں میں مصروف ہیں ،پاک فوج کے ہیلی کاپٹرز میں راشن اور دیگر سامان مہیا کیا جا رہا ہے اور سیلاب زدہ علاقوں سے لوگوں کو محفوظ مقامات پر منتقل کیا جا رہا ہے۔

سیکیورٹی ذرائع نے مزید  بتایا کہ پاک فوج کے مزید دستے بھی ریلیف آپریشن میں حصہ لینے کے لیے روانہ ہو چکے ہیں ۔تمام متاثرہ افراد کو بحفاظت ریسکیو کرنے اور محفوظ مقامات پر منتقل کرنے تک آپریشن جاری رہے گا۔