کسان کارڈ زرعی ترقی کیلئے گیم چینجر ثابت ہو گا،پورٹل پر کتنی لاکھ درخواستیں موصول ہوئیں ۔۔؟اہم اعدادوشمار جاری
لاہور ( ڈیلی پاکستان آن لائن )ترجمان محکمہ زراعت کے مطابق وزیر اعلی پنجاب کسان کارڈ زرعی ترقی اور کسانوں کی خوشحالی کے لیے گیم چینجر ثابت ہو گا۔اب تک پورٹل کے ذریعے 12لاکھ 89ہزار درخواستیں موصول ہو چکی ہیں۔بینک آف پنجاب نے 4لاکھ 87ہزار درخواستیں کی منظوری دے دی ہے۔کسانوں نے3لاکھ 61ہزار سے زیادہ کارڈ وصول کر لیے ہیں۔
ترجمان نے مزید کہا کہ وزیر اعلیٰ کی ہدایت پر کسان کارڈ کی تعداد 5لاکھ سے بڑھاکر 7لاکھ 50ہزار کر دی گئی ہے۔اب تک کاشتکاروں نے کسان کارڈ کے ذریعے 18ارب روپے سے زائد کی خریداری کر لی ہے۔کسان کارڈ کے ذریعے کاشتکار بیج،کھاد اور زرعی ادویات کی خریداری کر سکتے ہیں۔کاشت کاروں کو صوبہ بھر میں 2600رجسٹرڈ ڈیلرز سے گندم کی فصل کے لیے بلا سود قرضہ پر زرعی مداخل کی خریداری کی سہولت فراہم کی گئی ہے۔
ترجمان کے مطابق کسان کارڈ کے لیے غیر کمپوٹرائزڈ موضع جات کے کاشتکار بھی اہل ہوں گے۔کاشتکاروں کو کسان کارڈ کے ذریعے زرعی مداخل کی خریداری کے ساتھ 30فیصد تک رقم نکلوانے کی سہولت 20نومبر سے فراہم کر دی جائے گی جبکہ کسان کارڈ کی فراہمی کے لیے تحصیل کی سطح پر 136ڈلیوری سنٹرز قائم ہیں۔
