رحیم یار خان: پسند کی شادی پر لڑکی کے بھائیوں کا دلہے کے کزن پر تشدد،باپ صدمے سے چل بسا

رحیم یار خان(ڈیلی پاکستان آن لائن)رحیم یارخان میں پسند کی شادی کرنے پر دلہے کے 45 سالہ کزن کو دلہن کے بھائیوں نے تشدد کا نشانہ بنایا اور تیز دھار آلے سے ناک اور ہونٹ کاٹ دیئے، بیٹے پر تشدد ہوتا دیکھ کر متاثرہ شخص کا باپ صدمے سے چل بسا۔

نجی ٹی وی چینل جیو نیوز کے مطابق پولیس کاکہنا ہے کہ تشدد کا یہ واقعہ رحیم یار خان میں شیدانی کے علاقے جند والی سڑک پر پیش آیا جہاں سرعام ایک شخص کو تشدد کا نشانہ بناکر اس کی ناک اور ہونٹ کاٹ دیئے گئے۔

پولیس حکام کا بتانا ہے کہ 9 ماہ قبل متاثرہ شخص کے کزن نے ملزمان کی بہن سے پسند کی شادی کی تھی، لڑکی کے بھائیوں نے بدلہ لینے کیلئے لڑکے کے 45 سالہ رشتے دار پر تشدد کیا، بیٹے پر تشدد ہوتا دیکھ کر متاثرہ شخص کا والد صدمے سے چل بسا۔

پولیس کے مطابق زخمی شخص کو تشویشناک حالت میں ہسپتال منتقل کردیا گیا ہے جبکہ مرکزی ملزم کو گرفتار کرکے واقعے کا مقدمہ درج کرلیا گیا ہے۔