پاک ،سعودی عرب دفاعی معاہدے پر پاکستان جرنلسٹس فورم کا ردعمل بھی آگیا
جدہ (محمد اکرم اسد) پاکستانی صحافیوں کی قدیم تنظیم پاکستان جرنلسٹس فورم نے پاکستان اور سعودی عرب کی حالیہ دفاعی شراکت داری پر خوشی کا اظہار کرتے ہوئے اپنے ایک اجلاس میں کہا کہ سنجیدہ مسلمان ممالک کا ایک مضبوط اتحاد اس وقت نہایت ضروری تھا، اس معاہدے پر دونوں ممالک نے دستخط کرکے علاقے کی مستحکم ہونے کی نوید دی ہے اب مسلمانوں کا کوئی دشمن کسی بھی جارحیت کی جسارت نہیں کرے گا مسلمانوں کی طرف اور خاص طور پاکستان، سعودی عرب کے خلاف کوئی بھی اقدام اس شیطانی طاقت کی تباہی ہوگی۔
اجلاس میں کہا گیا کہ اس وقت ملک کی سیاسی اور عسکری قیادت کے درمیان اعتماد اور باہمی یقین کی جو سطح موجود ہے وہ پہلے کبھی دیکھنے کو نہیں ملی، اور یہی اتحاد پاکستان کو قومی اہمیت کے بڑے اہداف حاصل کرنے کے قابل بنا رہا ہے۔ وزیر اعظم شہباز شریف اور فیلڈ مارشل سید عاصم منیر مکمل ہم آہنگی کے ساتھ کام کر رہے ہیں، ان کے درمیان رابطہ اور پاکستان کی خارجہ اور دفاعی پالیسی کیلئے ایک مشترکہ ویژن پایا جاتا ہے سعودی عرب اور پاکستان کے درمیان نصف صدی سے زائد کی دفاعی شراکت داری اس وقت ایک نئی بلندی پر پہنچ گئی معاہدہ اعلان کرتا ہے کہ’’کسی بھی ملک کے خلاف کسی بھی جارحیت کو دونوں کے خلاف جارحیت تصور کیا جائے گا۔‘‘دفاعی معاہدہ روایتی طور پر علاقائی اتحاد جیسے نیٹو اور گلف کوآپریشن کونسل سے منسلک اجتماعی حفاظتی انتظامات کا آئینہ دار ہے، جو ممکنہ جارحین کو روکنے کے لیے ڈیزائن کیا گیا ہے۔
فورم کے بیان کے مطابق یہ دونوں ممالک کی اپنی سلامتی کو بڑھانے اور خطے اور دنیا میں سلامتی اور امن کے حصول کے لیے مشترکہ عزم کی عکاسی کرتا ہے، جس کا مقصد دونوں ممالک کے درمیان دفاعی تعاون کے پہلوؤں کو فروغ دینا اور کسی بھی جارحیت کے خلاف مشترکہ مزاحمت کو مضبوط بنانا ہے۔ اجلاس میں شریک مستند صحافیوں امیر محمد خان، شاہد نعیم، اکرم اسد، جمیل راٹھور، معروف حسین، زکیر احمد بھٹی، خالد نوازچیمہ، جاوید راہو، امانت اللہ، مریم شاہد نے اجلاس کے دوران پاکستان میں بھی نامور صحافیوں کے فورم پاکستان فیڈرل یونین آف جرنلسٹس اور ریاض میں پاکستانی صحافیوں ذکا اللہ، الیاس رحیم، وقار نسیم وامق، کامران حسانی سے بھی آن لائن بات کرکے دفاعی معاہدے کو پاکستان کیلئے خوش آئند قرار دیا۔
پی جے ایف نے پاکستان میں صحافیوں کو بتایا کہ سعودی عرب میں پاکستان کمیونٹی اس معاہدے پر خوشی کا اظہار کررہی ہے او مکہ و مدینہ میں بڑے پیمانے پر پاکستانیوں نے نماز جمعہ کے بعد معاہدے پر خوشی کا اظہار کرتے ہوئے اسکی مضبوطی کی دعا اور خطے میں امن کی دعا کی۔
