عالمی حلقہء فکر و فن کے زیرِ اہتمام سعودی عرب اور امریکہ میں تقریبات
ریاض (وقار نسیم وامق) معروف ادبی تنظیم عالمی حلقہء فکر و فن کے زیرِاہتمام 24 اپریل 2025 کو نوجوان شاعر ڈپٹی سیکرٹری جنرل عالمی حلقہء فکروفن کامران حسانی کے شعری مجموعہ “گلِ تازہ” کی تقریبِ رونمائی ریاض، سعودی عرب میں منعقد ہوگی جبکہ 27 اپریل 2025 کو شاعرِ مشرق علامہ محمد اقبالٓ کی برسی کے موقع پر “اقبالٓ فیسٹیول” ورجینیا، امریکہ میں منعقد ہوگا۔
عالمی حلقہء فکر و فن کے میڈیا کوآرڈینیٹر ذکیر احمد بھٹی نے تقریبات کی تفصیلات سے آگاہ کرتے ہوئے بتایا کہ عالمی حلقہء فکر و فن کی ادبی سرگرمیاں صدر وقار نسیم وامقٓ کی زیرِ قیادت زور و شور سے جاری و ساری ہیں اس سلسلے میں 24 اپریل 2025 کو سعودی عرب کے دارلحکومت ریاض میں نوجوان شاعر اور ڈپٹی سیکرٹری جنرل حلقہء فکر و فن کامران حسانی کے دوسرے اور تازہ ترین شعری مجموعہ “گلِ تازہ” کی تقریبِ رونمائی منعقد کی جائے گی جس کے مہتمم حلقہء فکر و فن کے سیکرٹری جنرل ڈاکٹر طارق عزیز ہیں، انہوں نے مزید بتایا کہ تقریبِ رونمائی میں شعراء و ادباء سمیت سفارت خانہ پاکستان کے افسران اور شائقینِ ادب کی بڑی تعداد شریک ہوگی اور اس موقع پر کامران حسانی اور گلِ تازہ کو نثری و شعری خراجِ تحسین پیش کیا جائے گا۔
ذکیر احمد بھٹی نے مزید تفصیلات سے آگاہ کرتے ہوئے بتایا کہ عالمی حلقہء فکر و فن امریکہ میں بھی ادب کی ترویج و ترقی کے لئے بھرپور طریقے سے فعال ہے، گزشتہ دنوں حلقہء فکر و فن امریکہ کی تنظیمِ نو کی گئی اور سالِ رواں کی تقریبات کا شیڈول جاری کیا گیا جس کے مطابق شاعرِ مشرق علامہ محمد اقبالٓ کی برسی کی مناسبت سے 27 اپریل 2025 کو “اقبالٓ فیسٹیول” کا انعقاد کیا جا رہا ہے، اس سلسلے میں حلقہء فکروفن کے چیئرمین ڈاکٹر محمد ریاض چوہدری اپنی ٹیم کے ہمراہ انتظامات میں مصروف ہیں، اقبالٓ فیسٹیول میں نامور پاکستانی شعراء و ادباء سمیت اقبال کے شاہینوں کی بڑی تعداد شرکت کرے گی اور شاعرِ مشرق علامہ محمد اقبالٓ کو زبردست خراجِ عقیدت پیش کیا جائے گا۔
