7 دوستوں کا 15 سال پرانا خواب پورا، برطانیہ کا سب سے قیمتی خزانہ دریافت

لندن (ڈیلی پاکستان آن لائن )جنوری 2019 میں سات دوستوں نے جنوب مغربی برطانیہ کے علاقے میں میٹل ڈیٹیکٹرز کے ذریعے خزانہ تلاش کرنے کا شوق پورا کرنے کا فیصلہ کیا۔ اس دوران انہوں نے تقریباً ایک ہزار سال پرانے چاندی کے سکے دریافت کئے جو زیرزمین دفن تھے۔
یہ گروپ مجموعی طور پر 2584 چاندی کے سکے تلاش کرنے میں کامیاب ہوا، جو 11 ویں صدی سے تعلق رکھتے ہیں۔ ماہرین نے اسے برطانیہ میں دریافت ہونے والا سب سے زیادہ مالیت کا خزانہ قرار دیا ہے۔
ان سکوں کو 56 لاکھ ڈالرز میں نیلام کیا گیا۔ اس میں سے 50 فیصد رقم دریافت کرنے والے افراد کو ملے گی جبکہ باقی رقم اس زمین کے مالک کی ہوگی جہاں سے سکوں کو نکالا گیا۔
یہ سکے South West Heritage Trust نے خریدے ہیں اور ان کی نمائش آئندہ ماہ برٹش میوزیم میں لندن میں ہوگی۔
ٹرسٹ کی جانب سے جاری کردہ بیان میں کہا گیا کہ یہ خزانہ برطانیہ کی تاریخ کے ایک اہم عہد کی نشانی ہے، جب Norman بادشاہت کا آغاز ہو رہا تھا۔ یہ سکے 1066 سے 1068 کے درمیان تیار کئے گئے تھے اور ان پر تین حکمرانوں کے نام درج ہیں:
ولیام اول، جو پہلا Norman بادشاہ تھا ہیرولڈ دوم، برطانیہ کا آخری Saxon بادشاہ ایڈورڈ، جو ہیرولڈ دوم سے قبل حکمرانی کرتا تھا۔
دریافت کرنے والے گروپ کے ارکان لیزا گریس اور ایڈم اسٹیپلز نے کہا کہ اس خزانے کی دریافت نے ان کا 15 سال پرانا خواب حقیقت بنا دیا۔
برطانیہ میں متعدد افراد خزانہ تلاش کرنے کی کوشش کرتے ہیں اور زیادہ تر میٹل ڈیٹیکٹرز کا استعمال کرتے ہیں۔ 2022 میں انگلینڈ، ویلز اور شمالی آئرلینڈ میں 1378 خزانے دریافت کئے گئے تھے۔