گندم پر امدادی قیمت سے متعلق آئی ایم ایف سے بات کررہے ہیں: رانا تنویر

                                                            اسلام آباد(آئی این پی) وفاقی وزیر برائے نیشنل فوڈ سکیورٹی رانا تنویر حسین نے کہا ہے کہ حالات دیکھ کر لگتا ہے اس بار گندم کم لگے گی جبکہ گندم پر امدادی قیمت دینے سے متعلق آئی ایم ایف سے بات کررہے ہیں۔قومی اسمبلی کی قائمہ کمیٹی برائے فوڈ سکیورٹی کا اجلاس سید حسن طارق کی زیر صدارت ہوا جس میں وفاقی وزیر رانا تنویر حسین شریک ہوئے۔ اجلاس میں گفتگو کرتے ہوئے رانا تنویر نے کہا کہ چینی گزشتہ سال سرپلس اور 13 لاکھ ٹن اضافی تھی، اکتوبر میں ہم نے 5 لاکھ ٹن چینی ایکسپورٹ کی۔موسمیاتی تبدیلی کی وجہ ہیٹ ویو آئی تو گنے میں سکروس کم ہوگئی اور پھرمافیا نے پھر جو کام کیا اس سے قیمت بڑھی ہے، اب ہم 150ملین ڈالر کی چینی منگوا رہے ہیں، آج چینی 170روپے فی کلو مل رہی ہے، 210لاکھ ٹن چینی اس وقت ہمارے پاس ہے، اس بار پھر گنے کی بمپر کراپ تھی مگر اب سیلاب کی وجہ سے متاثر ہو سکتی ہے۔ کوشش ہے اکتوبر کے پہلے ہفتے میں گندم پالیسی کا اعلان کردیں، دیکھنا ہے کہ گندم پالیسی میں سپورٹ پرائس رکھتے ہیں یا نہیں، میں نے تو تجویز دی کہ گندم کی سپورٹ قیمت رکھیں، وزیر اعظم بھی گندم سے متعلق مسلسل رابطے میں ہیں، میں نے پنجاب حکومت کو کہا ہے، گندم کی امدادی قیمت سے روٹی کی قیمت پر شائد ایک روپیہ فرق پڑیگا۔ چین کی سیٹلائٹ کمپنی سے بات کی ہے وہ سیلاب سے نقصان کا تخمینہ لگا کر بتائیگی، دو، چار روز میں سیلاب سے نقصانات کا اصل تخمینہ مل جائیگا۔ دوران اجلاس رکن کمیٹی عبدالقادر نے کہا کہ ہم جنوبی پنجاب میں گندم کی کاشت چھوڑ رہے ہیں، سیلاب نے کسان کو رگڑ دیا ہے، اس پر رانا تنویر نے کہا کہ جو حالات ہیں لگتا ہے اس سال گندم کم لگے گی، ایسے میں اگلے سال 1.5 ارب ڈالر کی گندم درآمد کرنا پڑے گی، گندم پر امدادی قیمت دینے سے متعلق آئی ایم ایف سے بات کررہے ہیں۔

رانا تنویر حسین