سعودی عرب کے قومی دن پر جدہ میں پاکستانی صحافیوں کی تقریب، کیک کاٹا گیا

جدہ (بیورو رپورٹ) سعودی عرب کے95ویں قومی دن کے موقع پر جدہ میں مقیم پاکستانی صحافیوں نے ایک پروقار تقریب کا انعقاد کیا، جس میں سعودی عوام سے اظہارِ یکجہتی کرتے ہوئے کیک کاٹا گیا اور "پاک سعودی دوستی زندہ باد" کے نعرے لگائے گئے۔

تقریب کا اہتمام پاک میڈیا جرنلسٹس فورم اور پاکستان جرنلسٹ فورم کے زیرِ انتظام کیا گیا، جس میں سینئر صحافیوں اور عہدیداران نے بھرپور شرکت کی۔ شرکاء میں چوہدری نورالحسن گجر، اکرم اسد، جمیل راٹھور، خالد نواز چیمہ، حافظ عرفان کھٹانہ، حسن بٹ، چوہدری معروف حسین ،ثاقب احسان مفل، عائشہ ناز ،مریم شاہد اور دیگر نمایاں صحافی شامل تھے۔

اس موقع پر مقررین نے کہا کہ پاکستان اور سعودی عرب کی دوستی ہمالیہ سے بلند اور سمندروں سے زیادہ گہری ہے۔ انہوں نے حالیہ دفاعی معاہدے کو دونوں برادر ملکوں کے تعلقات کی مضبوطی کا ثبوت قرار دیا اور سعودی عوام کو یومِ قومی کی مبارکباد پیش کی۔

صحافیوں نے شاہ سلمان بن عبدالعزیز اور ولی عہد شہزادہ محمد بن سلمان کا خصوصی شکریہ ادا کرتے ہوئے کہا کہ ان کی قیادت میں سعودی عرب ہزاروں پاکستانیوں کو باعزت روزگار فراہم کر رہا ہے۔

تقریب کے اختتام پر پاکستان اور سعودی عرب کی سلامتی، ترقی اور استحکام کے لیے خصوصی دعائیں کی گئیں۔