وکلا کے احتجاج کے دوران تشدد، موٹر سائیکل جلانے کا مقدمہ درج
کراچی(سٹاف رپورٹر)کالا پل پر وکلا کے احتجاج کے دوران مبینہ تشدد اور موٹر سائیکل نذر آتش کرنے کا مقدمہ ڈیفنس تھانے میں درج کر لیا گیا۔تفصیلات کے مطابق کالا پل کے قریب وکلا کی جانب سے ہونے والے احتجاج کے دوران تشدد اور موٹر سائیکل جلانے کے خلاف مقدمہ درج کیا گیا۔ مقدمہ ایڈووکیٹ عبد المالک کی مدعیت میں درج کیا گیا۔مقدمے کے متن کے مطابق ہمارے ایڈووکیٹ عبد الفتح کا مقدمہ محمود آباد تھانے میں درج نہیں کیا جا رہا تھا اور اس عمل کے خلاف ہم کالا پل سگنل پر احتجاج کر رہے تھے، کالا پل سگنل پر شرپسند عناصر نے وکلا پر تشدد اور موٹر سائیکل جلا دیں، شرپسندوں کے حملے سے مجھ سمیت دیگر ایڈووکیٹ زخمی ہوگئے۔پولیس حکام کے مطابق مقدمہ درج کرکے شرپسند عناصر کی سی سی ٹی وی فوٹیج حاصل کی جا رہی ہے۔واضح رہے کہ گزشتہ روز ایف ٹی سی فلائی اوور کے قریب احتجاج کی وجہ سے شارع فیصل کے دونوں ٹریک پر ٹریفک معطل ہوگئی تھی جبکہ اس موقع پر نامعلوم افراد نے ٹائروں کو بھی نذر آتش کیا۔
