پاک سعودی دفاعی معاہدے کو خوش آمدید کہتے ہیں، خطے کی سلامتی کیلئے اچھا آغاز: ایرانی صدر
نیویارک(این این آئی)ایرانی صدر مسعود پزشکیان نے کہاہے کہ ہم سعودی عرب اور پاکستان کے درمیان دفاعی معاہدے کو خوش آمدید کہتے ہیں، یہ معاہدہ مسلم ممالک کے ساتھ مل کر علاقے کی سلامتی کے لیے اچھا آغاز ہے۔ایرانی صدر ڈاکٹر مسعود پیزشکیان نے اقوام متحدہ کی جنرل اسمبلی سے اپنے پہلے خطاب میں پاکستان اور سعودی عرب کے مابین حالیہ دفاعی معاہدے کا خیرمقدم کرتے ہوئے کہاکہ یہ معاہدہ نہ صرف دو مسلم ممالک کے درمیان قریبی تعاون کی علامت ہے بلکہ یہ خطے میں ایک جامع اور متوازن سلامتی کے نظام کی بنیاد بھی فراہم کرتا ہے۔صدر مسعود پزشکیان نے کہا کہ اسرائیل نے ایران کی خودمختاری اور سا لمیت پر حملہ کیا، اسرائیل نے شام،یمن اورقطر میں بھی حملے کئے، دشمن ایرانی عوام میں تفرقہ ڈالنے میں ناکام رہے ہیں، ایران حملہ آوروں کے سامنے گھٹنے نہیں ٹیکے گا اور مزید مضبوط ہو گا، پابندیوں اور میڈیا وار کے باوجود ہمارے عوام فوج کی حمایت کے لیے متحد ہوئی، ہمارے سائنسدانوں کو قتل اور رہنماں کو نشانہ بنایاگیا۔ایرانی صدر نے کہا کہ ایران جوہری ہتھیار بنانے کا خواشمند نہیں، ایران کا جوہری پروگرام پرامن مقاصد کیلئے ہے، یورپی ٹرائیکا نے امریکی حمایت سے ہمارے خلاف پابندیاں لگائیں، قطر پر اسرائیل کے مجرمانہ حملے کی مذمت کرتے ہیں، ایران کے خلاف دہرا میعار ختم کیا جائے۔اپنے خطاب کے دوران ایرانی صدر نے گریٹر اسرائیل کے نظریے کو شدید تنقید کا نشانہ بنایا اور صیہونی ریاست پر خطے میں نسل کشی، نسلی امتیاز اور جارحیت کا الزام عائد کیا۔انہوں نے کہا اسرائیل اب نارملائزیشن (تعلقات کی بحالی)کے ذریعے سیکیورٹی نہیں چاہتا، بلکہ وہ اور اس کے حامی طاقت کے زور پر اپنی موجودگی مسلط کر رہے ہیں،اسے وہ امن بذریعہ طاقت کہتے ہیں، جو دراصل دبا اور تسلط کی پالیسی ہے۔
ایرانی صدر
