ابوظہبی میں بھارتی چوکیدار  راتوں رات کروڑ پتی بن گیا

ابو ظہبی (ڈیلی پاکستان آن لائن) متحدہ عرب امارات کے ابوظہبی میں مقیم 60 سالہ بھارتی  شہری  نمپلی راجامالیاہ نے بگ ٹکٹ کے ایڈرا میں 10 لاکھ درہم (تقریباً ساڑھے سات کروڑ روپے)  کا انعام جیت لیا۔ یہ انعام ان کی انتھک محنت کا اعتراف ہے، جو وہ اپنے خاندان کی کفالت کے لیے کرتے رہے ہیں۔

خلیج ٹائمز کے مطابق راجامالیاہ کا تعلق بھارت کے شہر حیدرآباد سے ہے ، وہ گزشتہ تین دہائیوں سے ابوظہبی میں مقیم ہیں اور چوکیدار کے طور پر کام کرتے ہیں۔ ان کی بیوی بھارت میں رہتی ہیں جبکہ ان کے بچے، جو ایک وقت میں یو اے ای لائے گئے تھے، اب علیحدہ رہتے ہیں۔

اپنی جیت پر خوشی کا اظہار کرتے ہوئے راجامالیاہ نے کہا "یہ لمحہ خوشی کا ایسا احساس تھا جسے میں الفاظ میں بیان نہیں کر سکتا۔ یہ میری پہلی جیت ہے اور میرے لیے بہت اہمیت رکھتی ہے۔"

دو ماہ پہلے انہوں نے دوبارہ بگ ٹکٹ خریدنا شروع کیا تھا اور اس بار انہوں نے 20 قریبی دوستوں کے ساتھ مل کر ٹکٹ خریدا۔ ان کا کہنا تھا کہ یہ اجتماعی کوشش کبھی خواب میں بھی اتنی بڑی کامیابی کی صورت میں سامنے آئے گی، اس کا اندازہ نہیں تھا۔