وزیر تعلیم کا معذور طالبہ کیلیےسکالرشپ، سرکاری نوکری اور 3 مرلہ پلاٹ کا اعلان، 50 ہزار کیش پرائز بھی دیا
لاہور ( ڈیلی پاکستان آن لائن )وزیر تعلیم رانا سکندر حیات سے جمبر گاؤں سے تعلق رکھنے والی دونوں بازوؤں سے معذور طالبہ مہوش عزیز نے ملاقات کی اور اپنے پاؤں کی مدد سے بنائی گئی پینٹگز پیش کیں۔ وزیر تعلیم نے بازوؤں سے معذور ہونے کے باوجود تعلیم جاری رکھنے پر طالبہ کی ہمت کی داد دی اور مزید تعلیم کی خواپش پر حوصلہ افزائی کرتے ہوئے سکالرشپ دینے کا بھی اعلان کیا۔
رانا سکندر حیات نے مہوش عزیز کو اپنی جیب سے 50 ہزار روپے کیش پرائز بھی دیا جبکہ ذاتی طور پر 3 مرلہ کا پلاٹ گفٹ کرنے کا بھی اعلان کیا۔ انہوں نے طالبہ کو سرکاری نوکری دلوانے کی بھی یقین دہانی کروائی۔
اس موقع پر وزیر تعلیم کا کہنا تھا کہ مہوش عزیز جیسی طالبات کی سرپرستی اور حوصلہ افزائی ہماری ذمہ داری ہے۔ اسے خودمختار کرنے کیلئے فنی تعلیم بھی دلوائیں گے۔
واضح رہے کہ مہوش عزیز 4 سال کی عمر میں کرنٹ لگنے کی وجہ سے دونوں بازوؤں سے محروم ہو گئی تھی جس کے بعد اس نے تمام تعلیم پاؤں کی مدد سے لکھ کر حاصل کی۔
