جمعۃ الوداع! ملک بھر میں عبادات کا اہتمام، سکیورٹی ہائی الرٹ
لاہور(ڈیلی پاکستان آن لائن) آج رمضان کا آخری جمعہ ہے جو ہمیں اس ماہ مقدس سے جدا کر رہا ہے جس نے ہمیں ہر گھڑی اللہ کی عطا کردہ بے شمار رحمتوں، نعمتوں سے ہر لمحہ نوازا، آج کی مناسبت سے مسلمانوں کی جانب سے خصوصی عبادات کا اہتمام کیا گیا ہے جس کے پیش نظر میں ملک سکیورٹی کے سخت انتظامات کیے گئے ہیں۔
ماہ رمضان کے آخری جمعہ کو جمعۃ الوداع کہتے ہیں، الوداع کے لغوی معنی رخصت کرنے کے ہیں چونکہ یہ آخری جمعۃ المبارک ماہ صیام کو الوداع کہتا ہے اس لئے اس کو جمعۃ الوداع کہتے ہیں۔
جمعۃ الوداع اسلامی شان و شوکت کا ایک عظیم اجتماع عام ہے، یہ اپنے اندر بے پناہ روحانی، نورانی کیفیتیں رکھتا ہے اور یہ جمعہ اس لحاظ سے بھی بڑی اہمیت کا حامل ہے کہ اب اس ماہ مقدس کے وداع ہونے کا وقت قریب آگیا ہے جس میں مسلمانوں کیلئے عبادات کا ثواب کئی گنا بڑھا دیا جاتا ہے۔
آج اس ماہ منور کا آخری جمعہ ہے جو ہمیں اس ماہ مقدس سے جدا کر رہا ہے جس نے ہمیں ہر گھڑی اللہ کی عطا کردہ بے شمار رحمتوں، نعمتوں سے ہر لمحہ نوازا، یہ ماہ مقدس ہم سے رخصت ہونے کو ہے، رمضان کے اس جمعہ کا ثواب بھی بہت زیادہ ہے، یہی وجہ ہے کہ پورے عالم اسلام کے مسلمان جمعۃ الوداع کو بڑے ذوق اور پورے اہتمام کے ساتھ عبادت کرتے ہیں، ساتھ ساتھ ان کا دل بھی بوجھل اور غمگین ہوتا ہے کہ نہ جانے اگلے سال کس کے مقدر میں پھر یہ مبارک لمحات آئیں گے یا نہیں۔
آج کے یوم سعید کو پوری دنیا کے مسلمان قبلہ اوّل مسجد اقصیٰ کی آزادی کے لئے ’’یوم القدس‘‘ کے طور پر بھی مناتے ہیں اور تجدید عہد کرتے ہیں کہ وہ قبلہ اوّل بیت المقدس یعنی مسجد اقصیٰ کی آزادی کے لئے ہر ممکن جدو جہد کریں گے۔
بیت المقدس اس عظیم عمارت کا نام ہے جو نہ صرف مسلمانوں بلکہ تمام آسمانی مذاہب کیلئے بھی مقدس اور محترم مقام ہے، مسجد اقصیٰ کو مسلمانوں کا پہلا قبلہ اوّل ہونے کا بھی اعزاز حاصل ہے، مسجد اقصیٰ کا ذکر قرآن کریم کے پندرھویں پارہ میں آیا ہے۔
اسی سرزمین میں حضرت عیسیٰ علیہ السلام کی ولادت بھی ہوئی، بہت سے انبیاء کرامؑ یہاں تشریف لائے اسی وجہ سے اسے انبیاء کی سرزمین بھی کہا جاتا ہے، آئیں! سال کے سب سے عظیم دن ہم سب مل کر قبلہ اوّل کی آزادی کیلئے خصوصی دعائیں کریں۔
