کرپٹو ایئر ڈراپس کیا ہوتے ہیں؟ کیسے کام کرتے ہیں؟ وہ تمام باتیں جو آپ جاننا چاہتے ہیں
نئی دہلی (ڈیلی پاکستان آن لائن) سنہ 2024 میں مختلف کرپٹو پراجیکٹس کی جانب سے سرمایہ کاروں کو تقریباً 14.91 ارب ڈالر کے ایئرڈراپس دیے گئے۔ کرپٹو ایئرڈراپس یعنی مفت کرپٹو ٹوکنز کی تقسیم ویب 3.0 کے ایک عام طریقہ کار میں شامل ہے، جو پراجیکٹس کی تشہیر اور کمیونٹی بڑھانے کے لیے استعمال کیا جاتا ہے۔ تقریباً 2.84 ٹریلین ڈالر کی کرپٹو مارکیٹ میں ڈویلپرز سوشل میڈیا کے ذریعے ان ایئرڈراپس کا اعلان کرتے ہیں تاکہ سرمایہ کاروں کو متوجہ کیا جا سکے۔ تاہم یہ طریقہ اکثر دھوکہ دہی کی بنیاد بھی بن سکتا ہے۔ اگرچہ ایئرڈراپس حقیقی کمیونٹی بنانے میں مددگار ثابت ہو سکتے ہیں، لیکن دھوکہ باز افراد بھی اس کا غلط استعمال کرتے ہیں اور معصوم صارفین کو دھوکہ دے کر ان کے فنڈز چرا لیتے ہیں۔ اس خطرے کے پیش نظر کرپٹو ایئرڈراپس میں شامل ہونے والے افراد کو چوکنا رہنے کی ضرورت ہے۔
ویب سائٹ گیجٹ 360 کے مطابق حالیہ برسوں میں کرپٹو ایئرڈراپس کی مقبولیت میں مسلسل اضافہ ہوا ہے۔ سنہ 2024 میں آن چین تجزیہ پلیٹ فارم "ڈراپس ٹیَب" کے مطابق عالمی سرمایہ کاروں کو 14.91 بلین ڈالر کے ایئرڈراپس دیے گئے۔
ایئرڈراپس کے عمل میں عام طور پر پانچ بنیادی مراحل شامل ہوتے ہیں: اعلان، رجسٹریشن، تصدیق، تقسیم، اور ٹوکنز کا کلیم کرنا۔ ویب 3.0 کے ڈویلپرز ٹیلیگرام، ایکس، ڈسکورڈ، اور انسٹاگرام جیسے پلیٹ فارمز پر اپنے پراجیکٹس کے ایئرڈراپس کا اعلان کرتے ہیں۔ جو لوگ ان ایئرڈراپس میں حصہ لینا چاہتے ہیں، انہیں پہلے اپنی کرپٹو والیٹ کی تفصیلات فراہم کر کے رجسٹریشن کرنی ہوتی ہے۔ بعض اوقات ڈویلپرز صارفین سے کچھ آسان کام بھی کرواتے ہیں، جیسے کہ پراجیکٹ کے اپڈیٹس سبسکرائب کرنا یا کوئی ایپ ڈاؤن لوڈ کرنا، تاکہ وہ ایئرڈراپ کے اہل ہو سکیں۔
صارفین کی تصدیق کے بعد حقیقی پراجیکٹس ایئرڈراپس مکمل کرتے ہیں اور کمیونٹی ممبرز کو مطلع کرتے ہیں کہ کن لوگوں کو ٹوکنز ملے ہیں۔ اس حکمت عملی کے ذریعے سرمایہ کاروں کو نئے ویب 3.0 پراجیکٹس کے ساتھ جُڑے رہنے کا موقع ملتا ہے، جبکہ ڈویلپرز کو بھی اپنی پیشکش کو نمایاں کرنے میں مدد ملتی ہے۔ یہ روایتی مارکیٹنگ کے مقابلے میں کم لاگت کا ایک مؤثر طریقہ ہے۔ حالیہ ہفتوں میں سٹارک نیٹ، شارڈیم، اور ایمبینٹ جیسے نمایاں کرپٹو ایئرڈراپس کا اعلان کیا گیا ہے۔
سنہ 2023 میں بائنانس نے کرپٹو ایئرڈراپس کے فوائد اور نقصانات پر روشنی ڈالی تھی۔ بائنانس کے بلاگ کے مطابق ایئرڈراپس سے پراجیکٹس میں لیکویڈیٹی آ سکتی ہے اور اس بات کو یقینی بنایا جا سکتا ہے کہ طاقت چند بڑے اداروں یا سرمایہ کاروں تک محدود نہ رہے۔ تاہم ایئرڈراپس سے سرمایہ کاروں کو مالی نقصان کا بھی سامنا ہو سکتا ہے، کیونکہ جعلساز خود کو ڈویلپرز ظاہر کرکے صارفین کے والیٹ ایڈریس حاصل کر لیتے ہیں اور ان کے اثاثے چرا لیتے ہیں۔
ڈیٹا اینالیٹکس فرم کوائن گیکو نے سرمایہ کاروں کو جعلی ایئرڈراپس کے خلاف خبردار کیا ہے۔ اگست 2021 میں کچھ دھوکہ بازوں نے خود کو کوائن گیکو کی ٹیم ظاہر کرکے ایک جعلی $GECKO ٹوکن کے ایئرڈراپ کا اعلان کیا تھا، جسے بعد میں کوائن گیکو نے مسترد کر دیا۔
ایئرڈراپس کا اعلان کرنے والے پراجیکٹس کے لیے بھی بعض خطرات موجود ہیں۔ بائنانس کے مطابق بعض اوقات ایئرڈراپس حقیقی کمیونٹی بنانے کے بجائے صرف فری ٹوکنز لینے والوں کو متوجہ کرتے ہیں جو پراجیکٹ کی حقیقی ترقی میں کوئی کردار ادا نہیں کرتے۔
اب تک کسی بھی ملک نے کرپٹو ایئرڈراپ ٹوکنز پر پابندی یا انہیں بلیک لسٹ نہیں کیا ہے، لیکن کرپٹو مارکیٹ میں ہونے والی نئی قانونی اصلاحات مستقبل میں ویب 3.0 پراجیکٹس کی تشہیر کے لیے واضح قوانین مرتب کر سکتی ہیں تاکہ سرمایہ کاروں اور پراجیکٹس دونوں کو تحفظ فراہم کیا جا سکے۔
