اسدقیصر کے ترقیاتی منصوبے پر تنقید پی ٹی آئی  کےباغی رہنما کو مہنگی پڑ گئی، مقدمہ درج ، گرفتار کر لیا گیا

اسلام آباد ( ڈیلی پاکستان آن لائن )عمران خان کے سابق قریبی ساتھی، تحریک انصاف ضلع صوابی کے سابق جنرل سیکرٹری اور پی ٹی آئی انٹرا پارٹی الیکشن چیلنج کرنے والے یوسف علی کو سابق سپیکر قومی اسمبلی اسد قیصر کے ناقص ترقیاتی پروجیکٹ کے خلاف ویڈیو بنانے پر مقدمہ درج کر کے گرفتار کر لیا گیا۔

 پاکستان تحریک انصاف کے بانی رہنما اکبر ایس بابر نے یوسف علی کی گرفتاری کی شدید مذمت کرتے ہوئے اسے خیبر پختون خواحکومت اور پی ٹی آئی کے جعلی لیڈروں کی انتقامی کارروائی قرار دیا ہے۔ انہوں نے کہا کہ یوسف علی کو سچ بولنے پر سزا دی جا رہی ہے۔ یہ پی ٹی آئی کی خود ساختہ قیادت کا اصل چہرہ ہے جو ملک میں آئین، جمہوریت اور بولنے کی آزادی کے لیکچر دیتی ہے اور خیبرپختونخوا میں سچ بولنے والوں پر مقدمے درج کر رہی ہے۔

 یوسف علی نے ضلع صوابی میں سابق سپیکر قومی اسمبلی اسد قیصر کے ترقیاتی فنڈز میں سے بنائے گئے ایک پل کے حوالے سے گزشتہ روز ایک ویڈیو بیان جاری کیا تھا جس میں اس ناقص منصوبے کے بارے میں عوام کو آگاہ کیا گیا تھا۔ اس ویڈیو کے وائرل ہونے کے بعد خیبر پختون خوا پولیس نے ضلع صوابی میں یوسف علی کے خلاف مقدمہ درج کر کے انہیں گرفتار کر لیا۔ یوسف علی کے قریبی دوستوں کے مطابق یوسف علی کو جمعہ کو گرفتار کیاگیا۔ یوسف علی پی ٹی آئی انٹرا پارٹی الیکشن چیلنج کرنے والے پارٹی فاؤنڈر گروپ کا بھی حصہ ہیں۔ وہ طویل عرصے سے پارٹی پالیسیوں اور اسد قیصر سمیت دیگر رہنماؤں کو کڑی تنقید کا نشانہ بناتے آ رہے ہیں۔2013 میں یوسف علی پی ٹی آئی کے ٹکٹ پر صوابی سے صوبائی اسمبلی کا الیکشن بھی لڑ چکے ہیں۔