شراب، اسلحہ برآمدگی کیس: علی امین گنڈاپور کے ناقابل ضمانت وارنٹ گرفتاری برقرار
اسلام آباد (مانیٹرنگ ڈیسک) ڈسٹرکٹ اینڈ سیشن کورٹ اسلام آباد نے شراب و اسلحہ بر آمدگی کیس میں وزیراعلیٰ خیبر پختونخوا علی امین گنڈاپور کے ناقابل ضمانت وارنٹ گرفتاری برقرار رکھے۔سینئر سول جج مبشر حسن چشتی نے علی امین گنڈاپور کے خلاف شراب اور اسلحہ برآمدگی کیس کی سماعت کی، علی امین گنڈاپور کے وکیل راجہ ظہور الحسن عدالت میں پیش ہوئے، تاہم وزیر اعلیٰ عدالت میں پیش نہ ہوئے۔علی امین گنڈاپور کے پیش نہ ہونے پر ان کے ناقابل ضمانت وارنٹ گرفتاری برقرار رکھے گئے ہیں۔پولیس کی جانب سے تعمیلی رپورٹ عدالت میں پیش نہیں کی گئی۔اس موقع پر علی امین گنڈاپور کے وکیل ظہور الحسن نے کہا کہ ان کا موکل شریف بندہ ہے عدالت میں پیش ہو جائے گا۔عدالت نے ریمارکس دیئے کہ اگر وہ واقعی شریف ہیں تو پھر انہیں اشتہاری قرار دے دیتے ہیں۔وکیل نے عدالت سے درخواست کی کہ وہ پنجاب بار کونسل کا الیکشن لڑ رہے ہیں اور انتخابی مہم میں مصروف ہیں، اس لئے لمبی تاریخ دی جائے۔اس پر عدالت نے ریمارکس دیئے کہ پھر تو آپ چاہیں گے کہ تاریخ دسمبر کے بعد کی دی جائے، اس کے ساتھ ہی عدالت نے کیس کی سماعت 25 فروری تک ملتوی کر دی۔
گنڈا پور وارنٹ برقرار