پاکستان نے ویسٹ انڈیز کو اپنے جال میں پھنسانے کیلئے بساط بچھا دی 

لاہور (ڈیلی پاکستان آن لائن )پاکستان کرکٹ بورڈ (پی سی بی) نے آئندہ ہوم ٹیسٹ سیریز میں ویسٹ انڈیز کو قابو کرنے کیلئے اسپنرز کا جال بچھانے کا فیصلہ کرلیا۔

تفصیلات کے مطابق ملتان میں شیڈول پاکستان اور ویسٹ انڈیز کے درمیان 2 ٹیسٹ میچز کیلئے اسپین فرینڈلی پچز بنائی جائیں گی تاکہ کالی اندھی کا اسپنرز کے ذریعے شکار کیا جاسکے۔

اسپنر ساجد خان اور نعمان علی کی ویسٹ انڈیز کیخلاف ہوم سیریز میں اسکواڈ میں واپسی ہوگی۔اس سے قبل ساجد خان کو جنوبی افریقا کی کنڈیشنز کی وجہ سے اسکواڈ سے باہر کردیا گیا تھا جبکہ انکی جگہ فاسٹ بالر اسکواڈ میں شامل کیا گیا تھا۔

سلیکٹرز نے ویسٹ انڈیز سیریز کیلئے سائیڈ میچز اور ٹیسٹ اسکواڈ کے حوالے سے مشاورت مکمل کرلی ہے۔واضح رہے کہ ویسٹ انڈیز کا ٹیسٹ اسکواڈ پیر 6 جنوری کو اسلام آباد پہنچے گا جبکہ پاکستان اور ویسٹ انڈیز کا پہلا ٹیسٹ 17 جنوری سے شروع ہوگا۔

دونوں ٹیموں کے درمیان دوسرا ٹیسٹ 25 جنوری سے ملتان اسٹیڈیم میں ہی کھیلا جائے گا۔