ایشیئن ہاکی چیمپئینز ٹرافی، کھلاڑیوں کو یومیہ الائونس مل گیا

  لاہور(آئی این پی )قومی ہاکی ٹیم کے کھلاڑیوں کو ایشیئن ہاکی چیمپیئنز ٹرافی میں شرکت کیلیے 25 دن کا یومیہ الائونس مل گیا۔

میڈیا رپورٹس کے مطابق پاکستان ہاکی فیڈریشن (پی ایچ ایف ) مالی مشکلات کے باعث اگست اور ستمبر کے دوران کھلاڑیوں کو یومیہ الانس فراہم کرنے سے قاصر رہی تھی۔ہاکی پلیئرز کو فنڈز کی کمی کی وجہ سے الائونس کی ادائیگی تاخیر کا شکار ہوئی تھی تاہم فنڈز آنے کے بعد پی ایچ ایف نے ہر کھلاڑی کو یومیہ 20 ہزار روپے ادا کیے۔

فیڈریشن نے تاخیر کے دوران کھلاڑیوں کے صبر اور تعاون پر کھلاڑیوں کا شکریہ ادا کیا۔ پی ایچ ایف نے اس بات کی بھی تصدیق کی کہ جونیئر ہاکی ٹیم کے کھلاڑیوں کے یومیہ الائونسز ادا کردئیے گئے ہیں۔

واضح رہے کہ 4 دسمبر کو مینز جونیئر ہاکی ایشیاکپ 2024 کے فائنل میں بھارت نے پاکستان کو 5-3 سے شکست دی تھی تاہم گرین شرٹس سلور میڈل جیتنے میں کامیاب رہی۔