ایک قطرہ  جب  نکلتا ہے سمندر اوڑھ کر۔۔۔

ایک قطرہ  جب  نکلتا ہے سمندر اوڑھ کر
مسکرا اٹھتے ہیں گل خاک مقدر اوڑھ کر

قہقہوں  کا شور  ہے صحراؤں  سے  بازار  تک
دیکھ میں چپ ہوں تری یادوں کا لشکر اوڑھ کر

اے نسیم صبح آ آغوش میں بھرلے مجھے
نیند  آئے  گی  تری  زلف  معنبر  اوڑھ  کر

آئنوں  کو   ژالہ باری  سے  بچانے  کے  لئے
شیشہ گرسوئے ہوئے ہیں سرپہ چھپر اوڑھ کر

کس سے پھر انصاف کی امید رکھے گی عوام
جب  ردائے  بے حسی بیٹھے  ہوں  افسر اوڑھ کر

اس پہ  ہوتی  ہیں خدا  کی رحمتیں  سایہ  کناں
اوڑھنی گھر سے نکلتی ہے جو دختر اوڑھ کر

یہ مجاہد قوم  و ملت  کے تحفظ کے  لئے
برسر مقتل چلے آتے ہیں خنجر  اوڑھ کر

روٹھ کر باد صبا سے پھر خزاں کا قافلہ
جانب منزل چلا  ہے  لاؤ  لشکر  اوڑھ کر

مضطرب رہتے ہیں مخمل پر بھی شہزادے ہلال
مفلسی  مٹی  پہ  سوجاتی  ہے  امبر  اوڑھ  کر

کلام :اشرف ہلال قاسمی ( بھارت )