’ شوہر اپنے دوستوں سے میرے ساتھ زیادتی کرواتا اور بیرون ملک بیٹھ کر ویڈیو دیکھتا ‘ خاتون کا خوفناک انکشاف

میرٹھ(ڈیلی پاکستان آن لائن ) بھارت میں ایک 35 سالہ خاتون نے اپنے شوہر پر الزام لگایا ہے کہ اس نے اپنے دوستوں کو تین سال تک اس کے ساتھ زیادتی کرنے کی اجازت دی اور اس کی ویڈیوبیرون ملک  سے دیکھتے ہوئے وہ پیسے وصول کرتا رہا۔

ٹائمز آف انڈیا کے مطابق خاتون کا کہنا ہے کہ اس کی شادی 2010 میں بلندشہر کے گلاوتھی علاقے سے تعلق رکھنے والے ایک شخص سے ہوئی تھی اور ان کےدو بیٹے اور دو بیٹیاں ہیں ۔ اس کا شوہر سعودی عرب میں آٹوموبائل مکینک کے طور پر کام کرتا ہے اور سال میں ایک یا دو بار گھر آتا ہے۔

خاتون نے اپنی پولیس شکایت میں کہا کہ تین سال قبل اس کا شوہر اپنے دو دوستوں کے ساتھ گھر آیا اور ان دونوں کو اس کے ساتھ زیادتی کرنے کی اجازت دی۔ "دونوں مرد بلندشہر کے ہی رہائشی ہیں اور جب میرا شوہر سعودی عرب میں تھا تو وہ مجھے اکثر زیادتی کا نشانہ بناتے تھے اور اس کے افعال کی ویڈیو ریکارڈ کرتے تھے۔ جب میں نے اپنے شوہر سے اس بارے میں بات کی، تو اس نے کہا کہ وہ خاموش رہوں کیونکہ اس کے بدلے اسے پیسے ملتے تھے۔"

خاتون نے پولیس کو شکایت میں کہا کہ "میرا شوہر سعودی عرب میں بیٹھ کر موبائل فون پر ویڈیو دیکھتا تھا۔ میں بچوں کے لیے خاموش رہتی تھی کیونکہ وہ مجھے طلاق دینے کی دھمکی دیتا تھا،" ۔

حال ہی میں خاتون نے اپنے خاندان کے ہمراہ بلندشہر کے سینئر سپرنٹنڈنٹ پولیس شلوک کمار سے ملاقات کی اور شکایت درج کروائی۔ ایس ایس پی نے بدھ کو کہا کہ شکایت موصول ہوئی ہے اور تحقیقات جاری ہیں۔

کمار نے بتایا کہ "چونکہ یہ معاملہ تین سال پرانا ہے، اس لیے مقامی پولیس اس کی مکمل تحقیقات کرے گی اور مناسب کارروائی کی جائے گی،" ۔

خاتون کے بھائی، جو خود بھی آٹوموبائل مکینک ہیں، نے بتایا کہ انہیں دو ہفتے پہلے اس واقعے کا پتہ چلا۔ "وہ سالوں تک اکیلے اس عذاب کا سامنا کرتی رہی، لیکن حال ہی میں شوہر کے ساتھ لڑائی کے بعد اس نے اپنی آواز اٹھائی۔ تب ہمیں اس کی زیادتی کا علم ہوا،" ان کے بھائی نے کہا۔

"اس نے اپنے بچوں اور خاندان کی عزت کے لیے خاموشی اختیار کی۔ اس وقت وہ تقریباً ایک ماہ کی حاملہ ہے۔ ہم انصاف کا مطالبہ کرتے ہیں۔ اس کے شوہر اور اس کے ساتھی ملک سے فرار ہونے کی کوشش کر رہے ہیں تاکہ گرفتاری سے بچ سکیں،" انہوں نے کہا۔