قومی سٹار محمد آصف نے سارک سنوکر چیمپئن شپ جیت لی

کولمبو(ڈیلی پاکستان آن لائن)قومی سٹار محمد آصف نے سارک سنوکر چیمپئن شپ جیت لی۔ڈان نیوز  کے مطابق کولمبو میں ہونے والی چیمپئن شپ میں محمد آصف نے شاندار کارکردگی دکھائی اور ناقابل شکست رہے۔

محمد آصف نے کوئی فریم ڈراپ کیے بغیر فائنل جیتا، انہوں نے فائنل میں سری لنکن کیوسٹ کو شکست دی، فاتح کیوئسٹ نے سری لنکن حریف کو 5 صفر سے شکست دی۔اس سے قبل نومبر میں محمد آصف نے تیسری بار ورلڈ سنوکر چیمپئن شپ کا ٹائٹل جیتا تھا، انہوں نے فائنل میں ایرانی حریف علی گھراہگوزلو کو 3 کے مقابلے میں 5 فریم سے شکست دی تھی۔

وہ قطر میں کھیلے جانے والے ایونٹ کے سیمی فائنل میں قبرص کے مائیکل جارجیو کو 3-5 سے شکست دے کر تیسری بار ورلڈ سنوکر چیمپئن شپ کے فائنل میں پہنچے تھے۔اس سے قبل کوارٹر فائنل میں انہوں نے متحدہ عرب امارات (یو اے ای )کے محمد شہاب کو 1-4 سے ہرا کر سیمی فائنل میں جگہ بنائی تھی۔

محمد آصف نے اس سے قبل 2012 اور 2019 میں بھی ورلڈ سنوکر فائنل جیتا تھا۔