اَج کِیہہ پکائیے | انور مسعود |
اَج کِیہہ پکائیے
چوہدری:
اَج کِیہہ پکائیے دَس تیرا کِیہہ خیال اے
رِحماں:
میں کِیہہ خیال دَساں میری کِیہہ مجال اے
چوہدری:
رِحمیاں چل اَج فیر چَسکے ای لا لئیے
لبَھ جان چنگِیاں تے بِھنڈیاں پکا لئیے
رِحماں: واہ واہ تساں بجھیاں نیں دِلاں دیاں چوریاں
میرا وی ایہہ دل سی پکائیے اَج توریاں
لونواں والی بھنڈی ہووے پوٹا پوٹا لمی ہووے
ہرّی تے کچور ہووے سوہنی ہووے کولی ہووے
وِچ ہون بکرے دی پُٹھ دیاں بوٹیاں
نال ہون چھنڈیاں تندور دیاں روٹیاں
مکھنے دا پیڑا ہووے لسی دا پیالہ ہووے
بِھنڈیاں دے نخرے تے گرم مصالحہ ہووے
بِھنڈیاں بنانا وی تے کوئی کوئی جاندا
رِنھناں پکانا وی تے کوئی کوئی جاندا
اُٹھاں فیر چوہدری جی پھڑاں میں تیاریاں
بِھنڈیاں بناواں اَج رَج کے کراریاں
چوہدری:
رِحمیاں ہزار ہون مزیدار بِھنڈیاں
ہوندیاں نیں کُجھ ذرا لیس دار بِھنڈیاں
رِحماں:
دفع کرو چوہدری جی سبزیاں دی تھوڑ اے
سانُوں ایہہ لسوڑیاں پکان دی کی لوڑ اے
بندہ کاہنوں بِھنڈیاں دی لیس دی ہواڑ لَئے
ایہدے نالوں پولی دی سریش بھانویں چاہڑ لَئے
چوہدری :
فیر کِیہہ خیال اے تیرا جھڑی نہ منا لَئیے
جے توں آکھیں رِحمیاں کریلے نہ پکا لئَیے
رِحماں:
رِیس اے کوئی چوہدری جی آپ دے خیال دی
جمی اے کوئی سبزی کریلیاں دے نال دی
ڈِھڈ وِچ اِنج جِویں لَو لگ پئی اے
تساں گل کیتی اے تے رال وگ پئی اے
سچ پُچھو چوہدری جی ایہو میری راء اے
مینوں وی چروکناں کریلیاں دا چاء اے
چوہدری جی ہووے جے کریلا چنگا پلیا
وِچ ہووے قیمہ اُتّے دھاگہ ہووے وَلیا
گنڈھیاں ٹماٹراں دے نال ہووے تنیاں
فیر ہووے گھر دے گھئیو وچ بھنیا
فیر کوئی چوہدری جی اُوس دا سواد اے
پار وی پکایا سی توانوں وی تے یاد اے
چوہدری :
ہور بیبا ایہدی مینوں ہر گل بھاؤندی
رِحمیاں کریلیاں وِچ کوڑ ذرا ہوندی اے
رِحماں:
دفع کرو زہر تے چرَیتا مینوں لگدائے
نِم تے دَھریک دا بھرا مینوں لگدائے
پلّے پلّے دنداں تھلّے جِیبھ پئی سکدی
کھا مر لئیے تے تریہہ نئیں مکدی
تمّے دِیاں گولیاں کریلیاں تو پِھکیاں
اینہاں نالوں چاہڑ لو کونِین دِیاں ٹِکیاں
چوہدری:
رِحمیاں فیر اِنج کر توں کوئی راء دے
پچھیں تے بتاؤنواں دا وی اپنا سواد اے
رِحماں:
رَب تُہاڈا بھلّا کرےکڈی سوہنی گل اے
ایہو جیئے ذائقے والا ہور کیہڑا پَھل اے
کالے کالے لشکدے تے گول مول چاہڑ لو
چوہدری جی لون تے وتاؤں چَول چاہڑ لو
چوہدری:
رِحمیاں پکانے نوں تے جی بڑا کردائے
بھٹیاں دی گرمی توں جی ذرا ڈردائے
رِحماں:
سچ اے جی چوہدری جی ڈھڈ کاہنوں بالنا
کھان والی چیز اے کوئی وینگناں دا سالنا
بھٹھیاں دے ڈَک وچ سٹنے ضرور نیں
کاہنوں پے بھخائیے، ساڈے ڈِھڈ کوئی تندور نیں
دفع کرو بھٹھیاں نوں بَھٹھے کاہنوں ساڑئیے
حبشیاں نوں چوہدری جی گھر کاہنوں واڑئیے
کالیاں دے نال کاہنوں مارئیے اُڈاریاں
ساڈیاں تے ہین امریکہ نال یاریاں
چوھدری :
وَدھ وَدھ بولنا ایں ایویں بڑبولیا
سبزیاں توں جا توں سیاستاں نوں پھولیا
دُوجے دی وی سن کجھ دُوجے نوں وی کہن دے
حکومتاں دی گل توں حکومتاں تے رہن دے
چنگا فیر بُجھ میرا کی خیال اے؟
رِحماں: بُجھ لئیے چوہدری جی چھولیاں دی دال اے
شاعر:انور مسعود
(شعری مجموعہ: "میلہ اکھیاں دا" سال اشاعت، 1974 )
Ajj Ki Pakaaiay
:Choudhry
Ajj Ki Pakaaiay Dass Tera Ki Khayaal A
:Rehma
Main Keh Khayaal Dassaan Meri Ki Majaal A
:Choudhry
Rehmiyaan Chall Aj Fair Chaskay E Laa Laiay
Labh Jaan Changiyaan Tay Bhindiyaan Pakaa Laiay
:Rehma
Wah Wa Tusaan Bujhiyaan Nay Dilaan Diyaan Choriyaan
Mera Vi Eh Dil Si Pakaaiay Aj Toriyaan
Loowaan Wali Bhindi Howay Pota Pota Latti Howay
Haari Tay Kachoor Howay Sohni Howay Kooli Howay
Vich Hon Bakray Di Puthh Diyaan Botiyaaan
Naal Hon Chhandiyaan Tandoor Diyaan Rotiyaaan
Makhnay Da Pairra Howay Lassi Da Piyaala Howay
Bhindiyaan Day Nakhray Tay Garm Misaala Howay
Bhindiyaan Banaana Vi Tay Koi Koi Jaanda
Rinhna Pakaana Vi Tay Koi Koi Jaanda
Uthaan Fair Choudhry Ji Pharraan Main Tayyaariaan
Bhindiyaan Banaawan Aj Rajj K Karaariyaan
:Choudhry
Rehmiyaan Hazaar Hon Bhindiyaan Karaariyaan
Hondiyaan Nen Kujh Zara Lais Daar Bhindiyaan
:Rehma
Dfaa Karo Choudhry Ji Sabziyaan Di Thorr Ay
Saanu Eh Lasoorriyaan Pakaan Di Ki Lorr Ay
Banda Kahnun Lsoorriyaan Di Lais Di Hawaarr Lay
Ehday Naalun Paoili Di Saraish Bhawen Chaahrr Lay
:Choudhry
Fair Keh Khayaal Ay Tera Jharri Na Manaa Layyay
Jay Tun Aakhen Rehmiyaan Karailay Na Pakaa Layyay
:Rehma
Rees Ay Koi Choudhry Ji Aap Day Khayaal Di
Jammi Ay Koi Sabzi Karailayaan Day Naal DI
Dhidh Vich Inj Koi Lao Lagg Pai Ay
Tussaan Gall Keeti Ay Raal Wagg Pai Ay
Sach Puchho Choudhry Ji Eiho Meri Raa Ay
Menu Vi Charokna Karaileyaan Da Chaa Ay
Choudhry Ji Howay Jay Karaila Changa Palleya
Vich Howay Qeema Uttay Dhaaga Howay Walleya
Dandheyaan Tamaattraan Day Naal Howay Tuneya
Fair Howay Ghar Day Ghiyo Vich Bhuneya
Fair Koi Choudhry Ji Oss Da Sawaad Ay
Par Vi Pakaaya Si Tuhaanun Vi Tay Yaad Ay
:Choudhry
Hor Beeba Mainu Aihdi Har Gall Bhaaondi Ay
Rehmiyaan Karailay Vich Kaorr Zara Hondi Ay
:Rehma
Dafa Karo Zehr Tay Charaita Maniu Lagda Ay
Nimm Tay Dharaik Da Bhiraa Mainun Lagda Ay
Pallay Pallay Dandaan Thallay Jaibh Pai Sukdi
Kha Mar Layyay Tay Taraih Nai Mukdi
Tummay Diyaan Goliyaan Karaileyaan Tun Phikkiyaan
Ehnaan Naalun Chaahrr Lao Kokain Diyaan Tikkiyaan
:Choudhry
Rehmiyaan Fair Inj Kar Tun Ei Koi Raa Day
Puchhen Tay Bataauaan Da Apna Sawaad Ay
:Rehma
RAB Tuhaad Bhala Karay Kiddi Sohni Gall Ay
Eho Jay Zaaiqay Da Hor Kehrra Phall Ay
Kaalay Kaalay Lishkaday Tay Gol Mol Chaahrr Lao
Choudhry Ji Laon Tay Wataaun Chaol Chaahrr Lao
:Choudhry
Rehmiyaan Pakaanay Nu Tay Ji Barra Karda Ay
Bhathiyaan Di Garmi Tun Dil Zara Darda Ay
:Rehma
Sach Ay Choudhry Ji Dhidh Kaahnun Baalna
Khaan Waali Cheez Ay Koi Waingnaan Da Saalna
Bhathiyaan Day Dakk Vich Suttnay Zaroor Nain
Kaahnun Pay Bhakhaaiay , Saaday Dhidh Koi Tandoor Nain
Dafa Karo Bhathiyaan Nun Bhathay Kaahnun Saarriay
Habshiyaan Nun Choudhry Ji Ghar Kaahnun Waarriay
Kaaliyaan Day Naal Kahnun Maariay Udaariyaan
Saadiyaan Tay Hain Hun Amrika Naal Yaariyaan
:Choudhry
Wadh Wadh Bolna En Ewen Barrboleya
Sabziyaan Tun Jaa Tun Siyaastaan Nun Warreyaa
Doojay Di Vi Sun Kujh Doojay Nun Vi Kehn Day
Hakoomtaan Di Gall Hun Hakoomtaan Tay Rehn Day
Changa Fair Dass Bhala Mera Ki Kahayaal Ay
:Rehma
Bujh Lai Choudhry Ji Chholeyaan Di Daal Ay
Poet: Anwar Masood
