علی امین گنڈاپور نے اسلام آباد میں اپنا قیام طویل کرلیا

اسلام آباد (ڈیلی پاکستان آن لائن )وزیراعلیٰ خیبرپختونخوا علی امین گنڈاپور نے اسلام آباد میں اپنا قیام طویل کرلیا۔
روز نامہ جنگ نے ذرائع کے حوالے سے بتایا کہ وزیراعلیٰ کے پی 4 دن سے اسلام آباد میں قیام پذیر ہیں، وہ بانی پی ٹی آئی سے ملاقات کر کے ہدایات لینا چاہتے ہیں۔
علی امین گنڈا پور عمران خان کو اپنی کارکردگی سے متعلق بھی آگاہ کریں گے، مختلف پالیسیز پر گائیڈ لائنز لیں گے، کچھ اہم فیصلوں پر بانی پی ٹی آئی سے مشاورت بھی کریں گے۔
ترجمان وزیراعلیٰ خیبرپختونخوا فراز مغل نے جیو نیوز سے گفتگو میں بتایا ہے کہ وزیراعلیٰ بانی پی ٹی آئی کی مشاورت سے اہم فیصلے کرتے ہیں، انہوں نے عمران خان سے ملاقات کے لئے عدالت سے بھی رجوع کیا ہے۔
ترجمان فراز مغل کا کہنا ہے کہ وزیراعلیٰ کے پاس کسی بھی جیل کا دورہ کرنے کا اختیار ہوتا ہے، امید ہے جلد علی امین گنڈاپور کی بانی پی ٹی آئی سے ملاقات ہو جائے گی۔