مسجد نبوی میں 120 ممالک کے 4,000 افراد کا اعتکاف، شاندار انتظامات

مدینہ منورہ (ڈیلی پاکستان آن لائن ) رمضان المبارک کے آخری عشرے میں مسجد نبوی میں 120 ممالک سے آئے 4,000 معتکفین کو خصوصی انتظامات کے تحت عبادت کا موقع فراہم کیا گیا۔
نجی ٹی وی ایکسپریس نیوز نے سعودی پریس ایجنسی کے حوالے سے بتایا کہ معتکفین کی سہولت کے لئے مکمل طبی سہولیات، افطار، عشائیہ اور سحری کی فراہمی، موبائل چارجنگ سٹیشنز اور سامان رکھنے کے لئے لاکرز مہیا کئے گئے۔
مردوں کے لئے مسجد کے مغربی چھت والے حصے میں اعتکاف کی جگہ مختص کی گئی، جہاں وہ سیڑھی نمبر 6 اور 10 کے ذریعے پہنچ سکتے تھے جبکہ خواتین کے لئے شمال مشرقی سیکشن میں دروازہ نمبر 24 اور 25A سے داخلے کی اجازت تھی۔
معتکفین کو سہولت پہنچانے کے لئے مددگار ڈیسک، فرسٹ ایڈ طبی مراکز، دینی رہنمائی کے لئے دروس، اور مختلف زبانوں میں ترجمے کی سہولت بھی فراہم کی گئی۔ ہر معتکف کو ایک ذاتی نگہداشت کا کٹ اور خصوصی شناختی بینڈ بھی دیا گیا تاکہ انہیں مختص شدہ جگہوں پر آسانی سے رسائی ملے اور خدمات کو مو¿ثر بنایا جا سکے۔
یہ انتظامات مسجد نبوی میں آنے والے معتکفین کی عبادات کو مزید پر سکون اور سہل بنانے کے لئے کئے گئے تاکہ وہ یکسوئی سے رمضان کے آخری عشرے میں عبادت کر سکیں۔