مسلم لیگ نے پاکستان بنایا مسلم لیگ ہی اسکو سنوار رہی ہے: عظمیٰ بخاری 

لاہور (ڈیلی پاکستان آن لائن) وزیر اطلاعات پنجاب عظمٰی بخاری نے کہا ہے کہ 23مارچ 1940 کو جس الگ وطن کےلئے عہد کیا گیا تھا وہ آج اقوام عالم میں روشن ستارے کی طرح جگمگا رہا ہے۔مسلم لیگ نے پاکستان بنایا مسلم لیگ ہی اسکو سنوار رہی ہے۔قائد اور اقبال کا پاکستان آج نوازشریف کی قیادت میں ترقی کی منازل طے کررہا ہے۔ وزیر اطلاعات کاکہنا تھا کہ یوم پاکستان ایک نئی سوچ،نئے حوصلے اور جذبے کا نام ہے۔ 23مارچ ہمیں دنیا میں منفرد اور عظیم قوم بننے کی یاد دلاتا ہے۔   الحمداللہ آج پاکستان اسلامی دنیا کی واحد ایٹمی قوت ہے۔عالم اسلام میں پاکستان اپنی منفر اور الگ پہچان رکھتا ہے۔ پاکستان آگے بڑھنے کےلیے بنا تھا اس نے آگے ہی بڑھنا ہے۔تمام اندرونی و بیرونی سازشوں کا قلع قمع کرتے ہوئے اس عظیم قوم نے خوشحالی کا سفر طے کرنا ہے۔ملکی سلامتی اور دفاع کےلئے افواج پاکستان کی ناقابل فراموش خدمات ہیں۔انکا مزید کہنا تھا کہ ارض پاک کی حفاظت کےلئے اپنی جانوں کا نذرانہ پیش کرنے والے شہداءقوم کے ماتھے کا جومر ہیں۔قوم اپنے عظیم شہداءکی قربانیوں پر فخر کرتی ہیں۔ہمارے شہداء اور غازی ہمارے ہیروز ہیں۔