پوپ فرانسس ہسپتال سے صحت یاب ہو کر ویٹیکن واپس پہنچ گئے
ویٹی کن سٹی (ویب ڈیسک) کیتھولک عیسائیوں کے مذہبی پیشوا پوپ فرانسس، پانچ ہفتے ہسپتال میں زیر علاج رہنے کے بعد ویٹیکن واپس پہنچ گئے ہیں۔
88 سالہ پوپ فرانسس نے روم کے جیمیلی ہسپتال میں دوہرے نمونیا کے خلاف کامیاب علاج کے بعد ہسپتال چھوڑا۔
انہوں نے 14 فروری کے بعد پہلی بار عوامی سطح پر شرکت کی، جب ہسپتال سے واپسی کے دوران انہوں نے ہاتھ ہلا کر عقیدت مندوں اور خیرخواہوں کا شکریہ ادا کیا۔
پوپ فرانسس کو پولیس کے سخت حفاظتی حصار میں ویٹیکن منتقل کیا گیا۔ تاہم، ان کے ڈاکٹروں کا کہنا ہے کہ عمر رسیدہ پوپ کو مکمل صحت یابی میں ابھی کافی وقت لگے گا۔
طبی ماہرین نے انہیں ویٹیکن میں مزید دو ماہ آرام کرنے کی تجویز دی ہے اور اس دوران انہیں بڑی یا دباؤ والی ملاقاتوں سے گریز کرنے کی ہدایت کی ہے، جس کے باعث یہ ابھی واضح نہیں ہے کہ پوپ فرانسس آنے والے مہینوں میں کتنی سرگرمیوں میں حصہ لیں گے۔
ویٹیکن سٹی کے ترجمان نے کہا کہ پوپ فرانسس فی الحال مکمل آرام کریں گے، اور مذہبی تقاریب میں ان کی شرکت کے بارے میں بعد میں فیصلہ کیا جائے گا۔ ہسپتال سے واپسی کے وقت پوپ فرانسس وہیل چیئر پر سوار تھے، اور ان کے سفید مذہبی لبادے کے نیچے دونوں بازوؤں پر پٹیاں واضح نظر آ رہی تھیں۔
