سی ٹی او کا شہرمیں ٹریفک چالان ٹارگٹ ختم کرنے کا حکم
لاہور(کر ائم رپو رٹر)چیف ٹریفک آفیسر اطہر وحید نے شہر میں ٹریفک چالان ٹارگٹ ختم کر دیا اور اس کے ساتھ ہی ٹریفک اسسٹنٹ کے تبادلوں اور وارڈنز کی ڈیوٹی کے حوالے سے نئے ایس او پیز جاری کیے ۔مراسلے کے مطابق اب کوئی بھی سینئر افسر چالان ٹارگٹ نہیں دے گا اور چالان کی تعداد کے حوالے سے کسی قسم کا دباؤنہیں ڈالا جائے گا مزید برآں، سینئر افسر کی مرضی کے بغیر سرکل افسر سمیت کسی بھی وارڈن کی تعیناتی نہیں کی جائے گی سی ٹی او اطہر وحید نے یہ بھی ہدایت دی کہ ایس پیز کسی بھی ڈی ایس پیز، سیکٹر انچارج اور وارڈنز کا تبادلہ کرواسکتے ہیں جبکہ ڈی ایس پیز اپنے سرکل میں سیکٹر انچارج اور وارڈنز کے تبادلے کرواسکتے ہیں۔ٹریفک وارڈنز کو بھی اپنی مرضی سے ٹریفک اسسٹنٹ کے تبادلے کی اجازت ہوگی۔ 7 روز کی مسلسل غیر حاضری پر متعلقہ افسر کو معطل کیا جائے گا اور ان کی تنخواہ بند کر دی جائے گی۔مراسلے میں یہ بھی کہا گیا ہے کہ کسی وی آئی پی ڈیوٹی کے بعد نفری کو سٹینڈ ڈاون دیا جائیگا اور ٹریفک سگنلز پر بھکاریوں، بچوں یا خواجہ سرا نظر آنے کی صورت میں متعلقہ افسر کیخلاف کارروائی کی جائے گی۔
