سپورٹس چیلنج کپ، دفاعی چیمپئن فیم سپورٹس نے جیت لیا
لاہور(سپورٹس رپورٹر) فیم فٹ بال کلب کے زیراہتمام فیم سپورٹس چیلنج کپ کا میلہ میزبان فیم سپورٹس کی فتح کے ساتھ اختتام پذیر ہوگیا، فائنل میں فیم سپورٹس کلب نے دلچسپ مقابلے کے بعد سنتوس کلب کو ایک صفر سے شکست دے کر ٹائٹل پر قبضہ برقرار رکھا۔ فاتح ٹیم کیلئے میچ کا واحد گول اسٹرائیکر کامران نے میچ کے پہلے ہاف میں سکور کیا۔
ٹورنامنٹ آرگنائرز ضیاء ڈوگر نےفاتح ٹیم کو ایک لاکھ پچاس ہزار روپے انعامی رقم اور خوبصورت ٹرافی سے نوازا۔ رنراپ ٹیم سنتوس کو ٹرافی کے ساتھ ایک لاکھ روپے انعام ملا جبکہ تیسرے نمبر پر رہنے والی ٹیم ریال لاہور کو تیس ہزار روپے اور ٹرافی ملی۔ ایونٹ کے بہترین اسٹرائیکر کا ایوارڈ فیم کے کھلاڑی قدیر خان اور بہترین گول کیپر کا اعزاز حسن نے حاصل کیا۔
ایونٹ کے اختتام پر آرگنائرز ضیاء ڈوگر نے ایونٹ مینجمنٹ ، کھلاڑیوں اور شائقین کا ایونٹ کے کامیاب انعقاد میں کردار ادا کرنے پر شکریہ ادا کیا۔
