چیمپئنز انڈر 19 کیمپ منگل سے مریدکے میں شروع ہوگا

لاہور (ڈیلی پاکستان آن لائن)ملک کے سرفہرست انڈر 19 کرکٹرز منگل کو لاہور کنٹری کلب  مریدکے  میں دو ہفتے کے چیمپئنز انڈر 19 کیمپ میں پانچ مینٹورز مصباح الحق، ثقلین مشتاق، سرفراز احمد، شعیب ملک اور وقار یونس کی نگرانی میں جمع ہونگے۔

ان کھلاڑیوں کو جن کی شناخت گزشتہ  ڈویژنل اور قومی ایونٹس کے دوران ہوئی تھی، انہیں آئندہ سیزن کی تیاری میں اپنی صلاحیتوں کو نکھارنے کا موقع ملے گا  جو  نمیبیا اور زمبابوے میں ہونے والے آئی سی سی انڈر 19 مینز کرکٹ ورلڈ کپ 2026 کے ساتھ  منسلک ہے۔اس کے علاوہ اینگرو کرکٹ کوچنگ پروجیکٹ کا تیسرا مرحلہ پہلے ہی کراچی کے حنیف محمد ہائی پرفارمنس سینٹر میں جاری ہےجس کی نگرانی پانچ ایلیٹ غیر ملکی کوچز کر رہے ہیں جنہیں مقامی کوچز کی معاونت حاصل ہے۔مریدکے کیمپ کے دوران کھلاڑی نہ صرف ٹریننگ اور فٹنس سیشنز میں حصہ لیں گے بلکہ تعلیمی لیکچرز اور پریکٹس میچز میں بھی حصہ لیں گے۔ کیمپ 16 فروری کو اختتام پذیر ہوگا۔