رمضان المبارک کے روزے رحمت و مغفرت کا سبب ہیں، جمعتہ الوداع کے موقع پر امام کعبہ کا خطبہ
ریاض(ڈیلی پاکستان آن لائن)مکہ مکرمہ میں رمضان المبارک کے آخری جمعہ کے موقع پر امام اور خطیب مسجدالحرام شیخ ڈاکٹر یاسر بن راشد الدوسری نے خطبہ دیا۔ امام حرم نے تقویٰ اختیار کرنے، اللّٰہ کی عبادت اور اس کی خوشنودی کے لیے عمل کرنے کی دعوت دی اور کہا کہ اللّٰہ تعالیٰ نے رمضان المبارک میں روزے کا حکم دیا تاکہ یہ رحمت و مغفرت کے نزول کا سبب بنے۔
انھوں نے کہا کہ ماہ رمضان ایمان کی تازگی اور تقویت سمیت استقامت اور تزکیہ نفس کا بہترین موقع ہے۔ امام کعبہ نے کہا کہ رمضان میں زکوٰۃ اور صدقات کی ادائیگی روزے دار کے لیے پاکیزگی کا ذریعہ ہے، زکوٰۃ و صدقہ غریبوں کےلیے خوراک کی فراہمی، اللّٰہ کی خوشنودی اور قربت کا عظیم ذریعہ ہے۔ امام کعبہ نے کہا کہ ماہ رمضان کے آخری ایام میں عبادات میں مشغول ہونا دعاؤں کی قبولیت کی سیڑھی ہے۔ انہوں نے کہا فطرہ ہر صاحب حیثیت مسلمان پر فرض ہے جو عیدالفطر کی نماز سے ایک یا دو دن قبل ادا کی جاسکتی ہے۔
