فیصل آباد زیادتی کیس ،حکومت انصاف کی فراہمی میں کوئی کسر نہیں چھوڑے گی:حنا پرویز بٹ

فیصل آباد ( ڈیلی پاکستان آن لائن )فیصل آباد میں ڈکیتی کے دوران اجتماعی زیادتی کا شکار ہونے والی خاتون کو فوری انصاف دلانے کے لیے وزیر اعلیٰ پنجاب مریم نواز  نے فوری احکامات جاری کر دیئے۔ ان کے احکامات پر چئیرپرسن پنجاب وومن پروٹیکشن اتھارٹی، حنا پرویز بٹ، متاثرہ خاتون کی دادرسی کے لیے سی پی او آفس پہنچ گئیں۔  
حنا پرویز بٹ نے متاثرہ خاتون کو وزیر اعلیٰ کا خصوصی پیغام پہنچایا اور یقین دہانی کرائی کہ حکومت انصاف کی فراہمی میں کوئی کسر نہیں چھوڑے گی۔ فیصل آباد پولیس نے برق رفتاری کا مظاہرہ کرتے ہوئے اجتماعی زیادتی میں ملوث 2 ملزمان کو چند ہی گھنٹوں میں گرفتار کر لیا۔ چئیرپرسن پنجاب وومن پروٹیکشن اتھارٹی کے مطابق علی شیر اور فیصل کے دیگر ساتھیوں کو بھی جلد قانون کے شکنجے میں لایا جائے گا۔  
اس موقع پر حنا پرویز بٹ نے کہا کہ خواتین کے خلاف زیادتی کے واقعات کسی صورت برداشت نہیں کیے جائیں گے۔ حکومت پنجاب خواتین اور بچوں کے تحفظ کے لیے ہر ممکن اقدامات کر رہی ہے۔ انہوں نے اس گھناؤنے جرم کی مذمت کرتے ہوئے کہا کہ ایسے واقعات کے سدباب کے لیے مؤثر حکمت عملی اپنائی جائے گی اور متاثرہ خاتون کو مکمل قانونی معاونت فراہم کی جائے گی۔  
سی پی او فیصل آباد صاحبزادہ بلال عمر بھی اس موقع پر موجود تھے اور پولیس کی جانب سے کیس پر تیزی سے پیش رفت جاری ہے۔ حکومت پنجاب کے احکامات کے تحت مجرموں کو کیفر کردار تک پہنچانے میں کوئی تاخیر نہیں کی جائے گی۔