پنجاب میں ”سہولت آن دی گو“بازار قائم کرنے کا فیصلہ، پلان طلب,وزیراعلیٰ نے4 ماہ کا ہدف مقررکردیا
لاہور (طیبہ بخاری سے ) پنجاب میں ”سہولت آن دی گو“بازار قائم کرنے کا فیصلہ، پلان طلب,وزیراعلیٰ نے4 ماہ کا ہدف مقررکردیا۔
تفصیلات کے مطابق پنجاب میں اپنی نوعیت کا پہلا اور منفرد”سہولت آن دی گو“بازار قائم کیے جائیں گے۔ وزیراعلیٰ پنجاب مریم نواز نے”سہولت آن دی گو“بازار پراجیکٹ کی اصولی منظوری دے دی۔ وزیراعلیٰ مریم نواز کی زیر صدارت خصوصی اجلاس میں ”سہولت آن دی گو“کے بارے میں بریفنگ دی گئی اور وزیراعلیٰ نے لاہور میں 14مقامات پر”سہولت آن دی گو“بازار پائلٹ پراجیکٹ کیلئے پلان طلب کر لیا۔
وزیراعلیٰ نے ”سہولت آن دی گو“ پائلٹ پراجیکٹ کے لیے 4 ماہ کا ہدف مقررکردیا ہے۔ ”سہولت آن دی گو“ بازار کے لیے روڈ کے اطراف میں سرکاری اراضی استعمال میں لائی جائے گی۔ لاہور میں ”سہولت آن دی گو“ پائلٹ پراجیکٹ کے تحت 816 سٹال بنائے جائیں گے۔
اجلاس میں بتایا گیا کہ”سہولت آن دی گو“ بازار ملتان روڈ،ہنجروال، مانگا منڈی، رائیونڈ، جی ون مارکیٹ، فیصل ٹاؤن، مون مارکیٹ اور بیدیاں روڈ پر قائم ہوں گے۔ ای ملت روڈ، گلشن راوی، شاہدرہ، شادمان اور سنگھ پورہ بھی شامل ہیں۔ سہولت آن دی گو بازار میں روڈزکے اطراف میں یکساں طرز کے کاٹیج ٹاپ شاپس پر اشیاء خوردنوش اور اشیاء ضروریہ دستیاب ہونگی۔ ”سہولت آن دی گو“بازار میں صاف ستھرا ماحول اور سیکیورٹی کا خاص اہتمام کیا جائے گا۔ اجلاس میں پنجاب کی ہر تحصیل میں ”سہولت آن دی گو“پراجیکٹ شروع کرنے پر اتفاق کیا گیا۔
وزیراعلیٰ مریم نواز کو پنجاب ماڈل بازار مینجمنٹ کمپنی کے چیئرمین محمد افضل کھوکھر نے ماڈل بازار پر رپورٹ پیش کی۔ وزیراعلیٰ نے رمضان میں لگنے والے ماڈل بازار پر اطمینان کا اظہار کیا۔
